Qatar Isroilga amirlik hududida joylashgan HAMAS guruhi rahbarlarini yo‘q qilishdan tiyilishni so‘rab murojaat qildi. Bu haqda Kan telekanali xabar berdi.
Ma’lum qilinishicha, so‘rov vositachilar orqali yuborilgan va soni bo‘yicha ikkinchisi hisoblanadi. Birinchisi Tehronda HAMAS yetakchi Ismoil Haniyaning yo‘q qilinishidan so‘ng aytilgandi. Qatarning bu qadami Dohaning Isroil va HAMAS o‘rtasidagi vositachilikni to‘xtatish hamda guruhning yuqori martabali vakillarini mamlakatdan chiqarib yuborish to‘g‘risidagi so‘nggi qarorlari bilan bog‘liq bo‘lishi mumkin.
Bunga javoban Falastinning Quds-Presse agentligi HAMAS yetakchilarining Qatardan chiqarib yuborilishi haqidagi ma’lumotni inkor etuvchi bayonot berdi. Guruh vakillari bu da’volarni chalkashlik va kelishmovchiliklar keltirib chiqarishga qaratilgan “yolg‘on” deb atadi.
2011-yildan beri, HAMAS yetakchilari Suriyadan chiqib ketganidan so‘ng, Qatar ularga boshpana berdi va Xolid Mashal kabi rahbarlar bilan diplomatik aloqalarni qo‘llab-quvvatladi. Hozirda HAMASni qo‘llab-quvvatlashga umid qilish mumkin bo‘lgan potensial davlatlar sifatida Turkiya, Eron va Livan tilga olinmoqda.
- 17-oktyabr kuni Isroil Falastinning HAMAS harakati yetakchisi Yahyo Sinvar o‘ldirilganini e’lon qildi. U G‘azo sektorida snayper tomonidan otib o‘ldirilgan.
- 28-sentyabr kuni esa Livanning “Hizbulloh” harakati bosh kotibi Hasan Nasrulloh Bayrutning janubiy chekkasida uyushtirgan havo hujumida halok bo‘lgandi. Isroil shu kuni tonnalab bombalar bilan 6 ta bino va bunkerlarni portlatib yuborgan. Ulardan birida “Hizbulloh” yetakchisi bo‘lgandi. Hozirda guruhga Naim Qosim rahbarlik qilmoqda.
Izoh (0)