Amerikalik milliarder Ilon Mask Nyu Yorkda Eronning Birlashgan millatlar tashkilotidagi elchisi Amir Said Iravoniy bilan uchrashdi. Bu haqda The New York Times xabar berdi.
Eron rasmiylariga ko‘ra, uchrashuv bir soatdan ko‘proq vaqt davomida maxfiy joyda bo‘lib o‘tgan. Suhbat Eron va AQSH o‘rtasidagi keskinlikni kamaytirish masalalariga bag‘ishlangan. Eron vakillari uchrashuvni “ijobiy” deb atagan va bundan buyon ham muloqot bo‘lishiga umid bildirgan.
Trampning kommunikatsiyalar bo‘yicha direktori Stiven Cheng uchrashuvga izoh berishdan bosh tortgan. Milliarder Ilon Mask ham hech qanday munosabat bildirmagan. Mazkur suhbat Tramp davrida Tehron va Vashington o‘rtasidagi aloqalar o‘zgarishi ehtimolini oshirmoqda. Uchrashuvni aynan Mask so‘ragani, Eron elchisi esa joy tanlagani aytilmoqda.
Ta’kidlanishicha, uchrashuvda elchi Iravoniy Erondan sanksiyalarni olib tashlash va Maskka biznesining bir qismini Tehronga olib o‘tishga erishishi kerakligini aytgan.
Mask va Trampning aloqalari. Nimalar ma’lum?
Biznesmen Ilon Mask AQSHning saylangan prezidenti Donald Trampning tarafdori hamda donori bo‘lgan. 5-oktyabr kuni u Trampning Pensilvaniyadagi saylovoldi mitingida nutq so‘zlagan. Milliarder “Amerikada konstitutsiya va demokratiyani saqlab qolish uchun” Tramp g‘alaba qozonishi kerakligini aytgan.
Sentyabr oyi boshida AQSH sobiq prezidenti saylovda g‘alaba qozongan taqdirda, Ilon Mask boshchiligida hukumat samaradorligini oshirish bo‘yicha komissiya tuzishini bildirgan. Mask keyinchalik bu masalani Tramp bilan muhokama qilgani va hamkorlikdan manfaatdor ekanini tasdiqlagan.
Shuningdek, milliarder prezidentlik saylovlarida respublikachi mag‘lubiyatga uchragan taqdirda, uni hibsga olishlari mumkinligini aytgan. Financial Times Mask Trampning prezidentlik kampaniyasini qo‘llab-quvvatlash uchun qariyb 75 million dollar ajratgani haqida xabar bergan. Mablag‘larning aksariyati reklamalarga sarflangan.
Izoh (0)