Isroil armiyasi Erondan hujum bo‘lishi ehtimoliga jangovar shayligi va hushyorligini oshirdi. Bu haqda manbalarga tayanib, The Times of Israel xabar berdi.
Kuchaytirilgan hushyorlik Isroil armiyasi bosh shtabining barcha bo‘linmalarida kundalik vaziyatni baholashni o‘z ichiga oladi. Butun razvedka bo‘linmasini jalb etgan holda turli usullar orqali razvedka ma’lumotlarini to‘plash kuchaytirilgan. Havo hujumidan mudofaa tizimlari ham yuqori shay holatida qolmoqda.
Eron hozirda qasos olish imkoniyatlarini ko‘rib chiqmoqda va javob berish ko‘lamini baholamoqda. Manbalar Eron Isroilning yuqori martabali mulozimlarini ham ichkari, ham tashqaridan nishonga olishini inkor etmaydi. Ayrim manbalarga ko‘ra, Eron Iroq hududi orqali Isroilga zarba berishni rejalashtirmoqda. Yahudiy davlati mazkur versiyaga tayyorgarlik ko‘rish maqsadida Iroqdagi “qonuniy nishonlar”ni aniqladi.
Isroilda THAAD raketaga qarshi mudofaa tizimini boshqarayotgan yuzlab amerikalik harbiylarning mavjudligi AQSH kuchlari bilan yaqin hamkorlikni yaqqol ko‘rsatdi, deydi harbiy mansabdor shaxs.
Yahudiy davlati THAAD tizimlari evaziga Eronning yadroviy va neft obyektlarini nishonga olmaslikka rozi bo‘lgandi. Oqibatda 26-oktyabr kuni Eronning raketa ishlab chiqarish zavodlari va havo hujumidan mudofaa tizimlari nishonga olingan. AQSH esa THAAD tizimlarini Isroilga yetkazib bergandi. Undan foydalanishni o‘rgatish uchun amerikalik muhandislar Isroilga yuborilgan.
Izoh (0)