AQSH prezidenti Jo Bayden administratsiyasi Eronni Isroilga qarshi yangi hujum qilishdan ogohlantirdi. Aks holda Qo‘shma Shtatlar Isroilning javob zarbasini to‘xtatishga qodirmasligi ma’lum qilindi. Bu haqda manbalarga tayanib, Axios xabar berdi.
Biz Isroilni to‘xtatib qola olmaymiz va Isroilning keyingi hujumi avvalgisi kabi aniq va maqsadli bo‘lishiga ishonch hosil qila olmaymiz, degan AQSH mulozimi.
U tegishli xabar Vashingtondan Shveysariya orqali Tehronga yetkazilganini aytdi. Agar zarbalar Iroq hududidan amalga oshirilsa, Isroil ham javob hujumi uyushtirishi mumkin.
Hammasi hujumning qanchalik ommaviy bo‘lishiga va uning natijalariga bog‘liq bo‘ladi, dedi Axios’ga Isroil rasmiylaridan biri.
Ta’kidlanishicha, 26-oktyabr kungi Isroilning Eronga hujumi AQSH bilan bir necha haftalik maslahatlashuvlar va zarbalar maqsadi muhokamalaridan so‘ng sodir bo‘ldi.
Isroilning Eronga hujumi
26-oktyabr kechasi yahudiy davlati armiyasi Erondagi harbiy obyektlarga havo hujumi uyushtirdi. Raketa ishlab chiqarish zavodlari va havo hujumidan mudofaa tizimlari nishonga olindi. Eron tomoni hujum qaytarilgani, biroq “cheklangan zarar” yetkazilganini bildirdi. Ikki harbiy xizmatchi halok bo‘ldi. Hujum munosabati bilan Eron Birlashgan Millatlar Tashkiloti Xavfsizlik kengashining favqulodda yig‘ilishini o‘tkazishga chaqirdi.
AQSH mudofaa vaziri Lloyd Ostin Eron “xato” qilmasligiga va vaziyatni yanada keskinlashtirmasligiga umid bildirdi hamda Isroil zarbalari o‘zaro hujumlarga chek qo‘yganini ta’kidladi.
Izoh (0)