Isroil 26-oktyabr kuni bergan zarbasi vaqtida Eronning yadroviy qurollar bo‘yicha maxfiy tadqiqot markazini yo‘q qildi. Bu haqda uch nafar amerikalik hamda ikki nafar isroillik amaldorlarga tayanib Axios portali xabar berdi.
Eron rasmiy ravishda mamlakat yadro qurolini ishlab chiqarmasligini bir necha bor da’vo qilgan.
Portal suhbatdoshlariga ko‘ra, Isroil zarbasi Tehrondan taxminan 232 km janubi-sharqda, Parchin harbiy majmuasi hududidagi Taleghan 2 obyektiga berilgan. Mamlakat oliy rahnamosi 2003-yilda yadroviy qurol ishlab chiqarishni taqiqlovchi fatvo chiqargunga qadar ushbu obyekt Eronning yadroviy qurol dasturining bir qismi bo‘lgan.
Biroq yil boshida Isroil va Amerika razvedkasi Parchindagi tadqiqotlar qayta boshlanganini qayd etgan.
“Ular yadroviy qurol ishlab chiqarishga asos soladigan ilmiy faoliyat bilan shug‘ullanardi. Bu juda sirli masala bo‘lgan. Eron hukumatining kichik bir qismi bu haqda bilar edi, lekin Eron hukumatining aksariyat qismi bilmagan”, dedi ismini oshkor etmagan AQSH rasmiysi.
Portal “Taleghan 2 obyekti Isroil tomonidan zarba nishoni sifatida tanlangani bejiz emas”ligini qayd etgan.
AQSH prezidenti Jo Bayden Isroil hukumatini Eron yadroviy dasturi obyektlariga hujum qilmaslikka chaqirgan.
“Biroq bu obyekt rasman e’lon qilinmagan. Shu sababli Eron yadroviy qurol ishlab chiqarishni qayta boshlaganini oshkor qilmasdan turib, unga zarba berilgani haqida xabar qila olmagan”, deyiladi xabarda.
26-oktyabrga o‘tar kechasi Isroil harbiy-havo kuchlari Erondagi harbiy obyektlarga havo hujumlarini amalga oshirgan edi. Isroil bu zarbalarni Eronning bir necha oy davom etgan hujumlariga javob deb atagan.
Isroil armiyasi Eronning strategik mudofaa qobiliyati butunlay yo‘q etilganini da’vo qilgan.
Eron yadroviy doktrinasi
- Eronda 2003-yildan beri oliy rahnamoning fatvosi mavjud bo‘lib, unga ko‘ra islomga zidligi tufayli yadroviy qurol ishlab chiqarish taqiqlanadi. 2024-yil oktyabr oyida Eron qonunchilari Oliy milliy xavfsizlik kengashini mudofaa doktrinasini qayta ko‘rib chiqish va yadro qurolini yaratishga ruxsat berishga chaqirgan edi.
Eron hukumati ekzistensial tahdid yuzaga kelgan taqdirda yadroviy doktrinani o‘zgartirishni istisno etmasligini ma’lum qilgan.
“Eronga ekzistensial tahdid yuzaga kelgan taqdirda ham yadroviy doktrinani o‘zgartirish mumkin. Yadro qurolini ishlab chiqarish uchun texnik imkoniyatlarimiz mavjud, inqilob yetakchisining fatvosi esa bizni to‘xtatib turgan yagona narsa”, degan mamlakat oliy rahnamosining maslahatchisi Kamol Xarroziy.
Izoh (0)