Shimoliy Koreya—O‘zbekiston: milliy jamoa ikkinchi o‘rinda qolishi uchun g‘alaba qozonishi shart bo‘lgan bahs haqida

Ertaga, 19-noyabr kuni Laos poyaxti Vyentyan shahri “Lao” stadionida Shimoliy Koreya va O‘zbekiston terma jamoalari to‘qnash keladi. Jahon chempionati saralashidan o‘rin olgan ushbu uchrashuv O‘zbekiston termasining to‘g‘ridan to‘g‘ri mundial yo‘llanmasini qo‘lga kiritish imkoniyatini saqlab qolishi uchun ahamiyatli hisoblanadi.

Mazkur o‘yinda kuvaytlik hakamlar brigadasi ishlaydi. Bosh hakam — Ali Ali Ahmad, unga yurtdoshlari Alanezi Abdulhadi va Abbos Ahmad yordam beradi. To‘rtinchi rasmiy hakam sifatida Ammar Ashkanani ishlaydi. VARda esa Abulloh Jamali faoliyat olib boradi.

Ertangi uchrashuvda O‘zbekiston jamoasi ko‘k, mezbonlar esa qizil libosda o‘ynaydi.

5 turdan so‘ng O‘zbekiston milliy jamoasi 10 ochko bilan ikkinchi o‘rinni egallab turibdi. Jamoa 3-bosqichdagi uch uchrashuvda g‘alaba qozondi. Eron bilan durang o‘ynagan o‘zbekistonliklar 14-noyabr kuni bo‘lib o‘tgan Qatarga qarshi uchrashuvda so‘nggi daqiqalardagi urilgan gol sabab mag‘lubiyatga uchradi.

Shimoliy Koreya jamoasi hujumkor o‘yin ko‘rsatishiga qaramay 5 uchrashuvda 2 ochko to‘plab, A guruhida so‘nggi o‘rinda bormoqda.

O‘zaro o‘yinlar natijasi

Shimoliy Koreya va O‘zbekiston milliy jamoasi 11 uchrashuvda to‘qnash kelgan. Uchrashuvlarning 8 tasida O‘zbekiston jamoasi g‘olib chiqqan bo‘lsa, bir bora koreyslar g‘alaba qozongan. Ikki uchrashuvda kuchlar teng kelgan.

Jamoalar ilk bor 1998-yili Osiyo O‘yinlari bahslarida duch kelgan. 7-dekabr kuni bo‘lib o‘tgan uchrashuvda o‘zbekistonliklar yirik (4:0) hisobda g‘alaba qozongan. Shimoliy Koreya jamoasi 2015-yili Jahon chempionati saralashi uchrashuvida O‘zbekiston termasi ustidan g‘alaba qozongan. 4:2 hisobida yakunlangan uchrashuv koreyslarning yagona muvaffaqiyati hisoblanadi.

Toshkentda o‘tkazilgan so‘nggi uchrashuvda mezbonlar Jaloliddin Masharipovning 20-daqiqada kiritgan yagona goli evaziga g‘alaba qozongan edi.

So‘nggi 5 o‘yin natijasi:

1. Shimoliy Koreya — O‘zbekiston 4:2, 16-iyun, 2015-yil;
2. O‘zbekiston — Shimoliy Koreya 3:1, 12-noyabr, 2015-yil;
3. O‘zbekiston — Shimoliy Koreya 2:0, 13-oktyabr, 2018-yil;
4. O‘zbekiston — Shimoliy Koreya 4:0, 7-iyun, 2019-yil;
5. O‘zbekiston — Shimoliy Koreya 1:0, 5-sentyabr, 2024-yil.

Terma jamoalarning so‘nggi o‘yin natijalari:

O‘zbekiston terma jamoasi so‘nggi 5 o‘yinda 3 bor g‘alaba qozondi. Eron jamoasi bilan durang qayd etgan jamoa, Qatarga mag‘lub bo‘ldi.

• Qatar — O‘zbekiston 3:2, 14-noyabr, 2024-yil;
• O‘zbekiston — BAA 1:0, 15-oktyabr, 2024-yil;
• O‘zbekiston — Eron 0:0, 10-oktyabr, 2024-yil;
• Qirg‘iziston — O‘zbekiston 2:3, 10-sentyabr, 2024-yil; 
• O‘zbekiston — KXDR 1:0, 5-sentyabr, 2024-yil.

Shimoliy Koreya jamoasi BAA va Qatar jamoalari bilan durang qayd etdi. Jahon chempionatidan o‘rin olgan qolgan 3 o‘yinda mag‘lub bo‘ldi. Koreyslar xuddi O‘zbekiston singari so‘nggi tur uchrashuvida 3:2 hisobida mag‘lubiyatga uchradi.

• KXDR — Eron 2:3, 14-noyabr, 2024-yil; 
• Qirg‘iziston — KXDR 1:0, 15-oktyabr, 2024-yil; 
• BAA — KXDR 1:1, 10-oktyabr, 2024-yil;
• KXDR — Qatar 2:2, 10-sentyabr, 2024-yil;
• O‘zbekiston — KXDR 1:0, 5-sentyabr, 2024-yil.

Yo‘qotishlar

O‘zbekiston terma jamoasida Oston O‘runov Qatar va Shimoliy Koreyaga bahslarni o‘tkazib yuborishi avvaldan ma’lum bo‘lgandi. Ular qatoriga Eldor Shomurodov va Otabek Shukurov ham qo‘shildi. Qatarga qarshi uchrashuvning dastlabki daqiqalarida jarohat olgan Eldor o‘rnini Jaloliddin Masharipovga bo‘shatib bergandi.

Otabek Shukurov esa jarohat bilan uchrashuvning so‘nggi daqiqalariga qadar harakat qildi. Ammo shifokorlar uning keyingi uchrashuvda maydonga tusha olmasligini qayd etdi.

Shimoliy Koreya safida Eronga qarshi o‘yinda jarohat olgan hujumchi Jo-guk Ri maydonga tusha olmasligi mumkin. Agar u o‘yinda ishtirok eta olmasa, Kum-song Jong asosiy tarkibda uning o‘rnini egallab, Han Kvang-Song bilan hujum chizig‘ida birga o‘ynashi kutilmoqda.

Eng qimmat o‘yinchilar

O‘zbekiston tarkibidagi Abbosbek Fayzullayev Rossiyaning “SSKA” klubida to‘p suradi. Portal uning transfer qiymatini 6 million yevroga baholagan. “Lans” klubi himoyachisi Abduqodir Husanov 5 millionlik qiymatga ega. Jamoa to‘purari va “Roma” klubi futbolchisi Eldor Shomurodov ham shunchaga baholangan.

Shimoliy Koreya futbolchilari asosan ichki chempionatda o‘ynashi sababli ularning bozor qiymatini aniqlash qiyin. Taxminiy hisob kitoblarga qaraganda, Kuk-chol Jang Shimoliy Koreyaning kengaytirilgan tarkibidagi eng qimmat futbolchi bo'lib, uning bozor qiymati 450 ming yevroni tashkil etadi.

FIFA reytingidagi o‘rni

O‘zbekiston terma jamoasi yangilangan FIFA reytingida dunyoda 58-o‘rinda qayd etildi. 1429 reyting ochkosiga ega o‘zbekistonliklar Osiyoda 7-o‘rinni egallab turibdi.

Shimoliy Koreya termasi jahonda 111-o‘rinda qayd etilgan. 1175 ochkoga ega jamoa Tojikiston va Qirg‘izistondan keyin joylashib, Osiyoda 19-o‘rinda turibdi.

Uchrashuv haqida

4-turdagi mag‘lubiyat sabab O‘zbekistonning to‘g‘ridan to‘g‘ri mundialga chiqish imkoni biroz kamaydi. Sababi Qatar va BAA jamoalari o‘rtasidagi farq 3 ochkoga yetdi. 5-turda BAA va Qatar jamoalari o‘zaro to‘qnash keladi. Bu esa o‘zbekistonliklarga ikkinchi o‘rinda qolish uchun g‘alabani naqd qilish kerak degani. To‘g‘ri, milliy jamoa durang bilan ham 5-turdan so‘ng ikkinchi o‘rinda qolishi mumkin, ammo yuqorida aytilganidek AQSHdagi mundial uchun yo‘llanma 4-bosqichga qolib ketish xavfi ortadi.

Sababi, 2-davrada O‘zbekiston jamoasi BAA va Eronga safar uyushtiradi, Qirg‘iziston va Qatarni uyida qabul qiladi. BAA ikkinchi o‘rin uchun harakat qilayotgan bo‘lsa, Eron O‘zbekiston ustidan qozonilgan g‘alaba evaziga mundial yo‘llanmasini ertaroq qo‘lga kiritish imkoni paydo bo‘ladi.

Bundan tashqari, Eronning oldinga o‘tib ketishi va mundial yo‘llanmasiga tur o‘yinlari yakunlanmasdan ega chiqishi biz uchun minusga ishlashi mumkin. Esingizda bo‘lsa, Rossiyada bo‘lib o‘tgan 2018-yilgi Jahon chempionati so‘nggi bosqich so‘nggi turida O‘zbekiston termasi Janubiy Koreyaga qarshi uchrashuvda durang qayd etib, uchinchi o‘rin bilan pley-off yo‘llanmasiga ega chiqib, navbatdagi bosqichga yo‘l olishi mumkin edi. Ammo Eron jamoasi so‘nggi daqiqalarda Suriyadan to‘p o‘tkazib yubordi va O‘zbekiston 4-o‘rinni egallab, guruhda qolib ketdi. Anzur Ismoilovning intervyusi esingizda bo‘lsa kerak. Forslar bu safar ham O‘zbekiston zarari uchun “tasodifan” mag‘lub bo‘lib qolishi mumkin.

Shunday ekan, jamoa uchun KXDR va Qirg‘izistonga qarshi uchrashuvlardagi g‘alaba suv va havodek zarur.

Shimoliy Koreyada esa to‘g‘ridan to‘g‘ri yo‘llanmaga ega chiqish imkoniyati deyarli yo‘q. Ammo jamoa 3 yoki 4-o‘rinni egallab, 4-bosqich orqali mundialga yo‘l olish imkonini saqlab turibdi. Shuning uchun jamoa Laosdagi uchrashuvda bor imkoniyatini ishga solishi kutilmoqda.

O‘zbekiston terma jamoasida 3 asosiy o‘yinchining yo‘qligi ham koreyslar foydasiga ishlashi mumkin.

Yetakchilarning yo‘qligi Katanesga ham sinov, ham imkoniyat bo‘lishi mumkin. Deylik, Shukurovning yo‘qligi hujum ortiga Abbosbek Fayzullayevning tushishiga imkon yaratadi. Turg‘unboyevning o‘ngda, hujumda esa Boburga imkon berilishi mumkin. Bu safar Katanes Abbosni o‘zi uchun noqulay hisoblangan o‘ng qanotga qo‘yishida mantiq yo‘q. Demak, biz Shimoliy Koreyaga qarshi hujumkor tarkib ko‘rishimiz mumkin. Har holda, yordamchi murabbiy terma uchun durang natija qoniqarli ekanini aytmasa bo‘ldi. 

G‘alaba jamoaning ochkolari sonini 13 taga yetkazadi va terma Eronni quvish va ortdagi jamoalardan uch ochko oldinda bo‘lish imkonini beradi. Shunday ekan, Katanes shogirdlari ushbu o‘yin uchun bor imkoniyatlaridan foydalanishi shart va zarur.