Hindiston o‘zining birinchi gipertovushli raketasini muvaffaqiyatli sinovdan o‘tkazdi. Bu haqda mamlakat mudofaa vaziri Rajnat Singx ma’lum qildi.
Raketaning parvoz masofasi 1500 kilometrni tashkil etadi. U har xil turdagi jangovar kallaklarni olib yurishi mumkin.
Hindiston uzoq masofaga uchadigan gipertovushli raketaning parvoz sinovlarini muvaffaqiyatli o‘tkazib, muhim bosqichga erishdi. Bu tarixiy lahza va bu muhim yutuq mamlakatimizni o‘ta muhim va ilg‘or harbiy texnologiyalarga ega bo‘lgan tanlangan davlatlar qatoriga kiritdi, deydi Hindiston mudofaa vaziri.
Oddiy ballistik raketalardan farqli o‘laroq, gipertovushli raketalar past balandlikda uchadi, nishonga tezroq erishadi va zamonaviy havo hujumidan mudofaa tizimlari tomonidan urib tushirish ehtimoli kamroq.
AQSH, Xitoy va Rossiya gipertovushli qurollarga ega
Hozirgi vaqtda AQSH, Xitoy va Rossiya gipertovush qurollariga ega. Eron, Shimoliy Koreya hukumati, shuningdek, Yaman husiylari ham bunday raketalarni sinovdan o‘tkazganini ma’lum qilgan. Ammo ular armiyalariga foydalanishga topshirilgani haqida ma’lumotlar mavjud emas. Buyuk Britaniya, Fransiya, Avstraliya va Yaponiya gipertovushli raketalar ishlab chiqish yoki sinovdan o‘tkazishning turli bosqichlarida.
So‘nggi yillarda Hindiston mudofaa qobiliyatini mustahkamlash bo‘yicha keng ko‘lamli chora-tadbirlarni amalga oshirib, AQSH, Yaponiya va Avstraliya, shuningdek, Germaniya bilan hamkorlikni kengaytirmoqda. Gipertovushli raketalarga egalik qilish bunday qurolga ega bo‘lmagan davlatlarga nisbatan strategik ustunlik beradi. Nazariy jihatdan bunday qurolning mavjudligi dushman hududidagi muhim nishonlarga zarba berish qobiliyatini kafolatlaydi.
Izoh (0)