AQSHning saylangan prezidenti Donald Tramp Oq uyga qaytishi bilan Isroilni qo‘llab-quvvatlashni kuchaytirishi mumkin, chunki u o‘z ma’muriyatidagi asosiy lavozimlarga ashaddiy isroilparast qarashlari bilan tanilgan shaxslarni tayinlashni taklif qilgan. Bu haqda The Washington Post (WP) yozmoqda.
Unga ko‘ra, AQShning Isroildagi elchisi bo‘lishi mumkin bo‘lgan Arkanzas shtatining sobiq gubernatori Mayk Xakkabi G‘arbiy Sohilni Isroil tomonidan bosib olinishi tarafdori. Tramp tomonidan Mudofaa vaziri lavozimiga taklif qilingan amerikalik teleboshlovchi, Afg‘oniston va Iroqdagi urushlar faxriysi Pit Xegset Falastin davlatchiligiga qarshi fikrlarni ko‘p bora bildirgan.
AQSh Milliy razvedkasining sobiq direktori, Markaziy razvedka boshqarmasining (CIA) ehtimoliy yangi rahbari Jon Retkliff ham Isroilning ashaddiy tarafdori.
Uning fikricha, G‘azo sektoridagi gumanitar falokat va tinch aholining qurbon bo‘layotgani Isroilga harbiy yordamni davom ettirishga to‘sqinlik qilmasligi kerak.
Isroil Trampning g‘alabasidan xursand
Nashrning qayd etishicha, isroillik siyosatchilar Trampning saylovdagi g‘alabasidan xursandchiliklarini yashirmayaptilar va respublikachilar davrida Isroilning AQSH tomonidan qo‘llab-quvvatlanishi ortishiga umid qilishyapti.
Tramp AQSh prezidenti sifatidagi birinchi muddatida Isroilni Eron tahdididan himoya qilishda yordam berishini qayta-qayta eʼlon qilgandi. U bosib olingan Golan tepaliklari ustidan Isroil suverenitetini tan oldi, AQSh elchixonasini Tel-Avivdan Quddusga ko‘chirdi va bir qator arab davlatlari bilan Isroilning munosabatlarini normallashtirgan kelishuvlarga ko‘maklashdi.
Ilon Mask ham Tramp administratsiyasida
Avvalroq amerikalik milliarder Ilon Mask va tadbirkor Vivek Ramasvami saylangan prezident Donald Tramp davrida davlat samaradorligini oshirish bo‘yicha yangi departamentga rahbarlik qilishi xabar berilgandi.
“Birgalikda bu ikki ajoyib amerikalik mening ma’muriyatim uchun davlat byurokratiyasini demontaj qilish, ortiqcha qoidalarni, keraksiz xarajatlarni kamaytirish va federal agentliklarni qayta tashkil etish yo‘lini ochib beradi”, dedi Tramp.
Biznesmen Ilon Mask AQSHning saylangan prezidenti Donald Trampning tarafdori hamda donori bo‘lgan. 5-oktyabr kuni u Trampning Pensilvaniyadagi saylovoldi mitingida nutq so‘zlagan. Milliarder “Amerikada konstitutsiya va demokratiyani saqlab qolish uchun” Tramp g‘alaba qozonishi kerakligini aytgan.
Tramp 20-yanvardan ishga kirishadi
Tramp 5-noyabr kuni bo‘lib o‘tgan saylovda g‘alaba qozondi. U Demokratlar vakili, AQSh vitse-prezidenti Kamala Harrisni mag‘lub etdi. Respublikachilar AQSh Kongressi Senati ustidan ham nazoratni o‘z qo‘llariga olishga muvaffaq bo‘lishdi.
Tramp 2025-yil 20-yanvardagi inauguratsiyadan so‘ng AQSH prezidenti lavozimini egallaydi.
Izoh (0)