Eronda hijob o‘rash qoidalarini buzgan ayollar uchun maxsus “klinika” ochilishi e‘lon qilindi. Bu haqda The Telegraph xabar berdi.
Rasmiy ravishda “hijobni yechishni rad etish klinikalari” deb nomlangan bu muassasalar diniy qoidalarga amal qilmaydigan ayollar va o‘smirlarga ruhiy yordam ko‘rsatadi. Ezgulikni targ‘ib qilish va illatlarning oldini olish shtabining Xotin-qizlar va oila bo‘limi boshlig‘i Mehri Tolebiyga ko‘ra, davolanish ixtiyoriy bo‘ladi. Bunday markazlarning asosiy maqsadi — qo‘llab-quvvatlash va “ilmiy” davolash orqali eronlik ayollarning “qadr-qimmatini va kamtarligini tiklash”.
Ezgulikni targ‘ib qilish va illatlarning oldini olish shtabi Buyuk Britaniya va boshqa davlatlar tomonidan inson huquqlarini buzgani va Eronning islomiy kiyinish qoidalariga rioya qilmagan ayollarga nisbatan jazo choralari ko‘rgani uchun sanksiyalar ostida. Uni to‘g‘ridan-to‘g‘ri oliy rahbar Oyatulloh Ali Xomanaiy tomonidan tayinlangan Muhammad Solih Hoshimiy Golpayegani boshqaradi.
Eronda hijobga qarshi noroziliklar
Hozirda Eronda ayollar jamoat joylarida hijobsiz chiqish huquqiga ega emas. Shu tufayli mamlakat bo‘ylab muntazam ravishda norozilik namoyishlari bo‘lib o‘tadi. 2022-yili 22 yoshli Mahsa Aminiy hijobni noto‘g‘ri o‘ragani uchun axloq politsiyasi tomonidan hibsga olinganidan keyin vafot etgandi. Bu Eron bo‘ylab noroziliklarga sabab bo‘lgan.
O‘shandan beri Tehron yashirin kuzatuvni kuchaytirish, axloqiy politsiyaning kuchli ishtiroki va hijobsiz ayollarning jamoat joylariga kirishini taqiqlash kabi choralar bilan ayollarni bostirishda davom etdi. BMT buni “gender aparteid” deb atadi.
2022-yilgi norozilik namoyishlaridan so‘ng, hijobsiz o‘z suratlarini joylashtirgan mashhur shaxslarga sud qarori bilan har hafta psixiatriya markazlariga tashrif buyurish uchun mandat berildi. Afsaneh Bayegan, Azadeh Samadi, Leyla Bolukat kabi aktrisalar ruhiy salomatlik sertifikatlarini taqdim etishga majbur bo‘ldi. Boshqa jazolarga banklarni muzlatish va sayohatlarni taqiqlash kiradi.
Eronda talaba qiz norozilik sabab ko‘chada yalang‘och yurdi
2024-yil noyabr oyi boshida Tehronda hijobni noto‘g‘ri o‘ragani ortidan ta’qibga uchragach, ko‘chada yechinib yurgan talaba qiz qo‘lga olindi. Ijtimoiy tarmoqlarda universitetning ilmiy-tadqiqot bo‘limi hovlisida ichki kiyimdagi qiz yurgani aks etgan video tarqaldi. Boshqa bir videoda bir necha erkak uni avtomobilga majburlab o‘tqazib, olib ketayotgani ko‘rsatilgan.
Qizni hibsga olish paytida kaltaklashgan, jumladan, boshini mashina eshigiga urishgan. Mashinaning shinalarida qon izlari ko‘ringan, deb yozgan Amir Kabir Newsletter talabalar nashriga.
Talaba ruhiy kasalliklar shifoxonasiga majburiy davolanishga yuborilgan. Eronda ayollar sochlarini ro‘mol ostiga yashirib, keng kiyim kiyishlari shart. Aprel oyidan boshlab Eron ko‘chalarida hijobni to‘g‘ri kiyishni nazorat qiluvchi “Basij” xodimlari soni sezilarli darajada oshgan. Universitetlar esa tashqi ko‘rinishi qoidalarga mos kelmaydigan talaba qizlarni darsga kiritmaslik uchun yuzni tanish texnologiyasidan foydalanmoqda.
Eronning yangi prezidenti Mas’ud Pezeshkiyon majburiy hijobni qo‘llab-quvvatlamaydi, ammo bu masalada — Eron oliy rahnamosi Oyatulloh Ali Xomanaiy kabi vakolatlarga ega emas.
Izoh (0)