АҚШ президенти Дональд Трамп бошлаган савдо урушлари харажатларнинг кўпайиши ва савдонинг камайиши туфайли жаҳон компанияларига 34 миллиард доллардан ортиқ зарар етказди. Бу ҳақда Reuters агентлиги корпорациялар ҳисоботлари таҳлили асосида ўз ҳисоб-китобларига таянган ҳолда хабар бермоқда.
“Президент Дональд Трампнинг савдо уруши компанияларга йўқотилган савдолар ва ошган харажатлар кўринишида 34 миллиард доллардан ортиқ зарар келтирди. Тарифлар бўйича давом этаётган ноаниқлик дунёнинг йирик компанияларида қарор қабул қилиш жараёнини издан чиқараётгани сабабли бу сумма яна ошиши кутилмоқда”, дейилади хабарда.
Агентлик компанияларнинг корпоратив ҳисоботларини таҳлил қилган. Унга кўра, деярли барча йўқотишлар — 33 миллиард доллар — биржаларда савдо қилувчи йирик компанияларнинг баҳолашларига асосланган. Улардан 32 таси АҚШда S&P 500 кенг бозор индекси ҳисобига, учтаси умумевропа SТОХХ 600 индексига ва 21 таси Япониянинг Nikkei 225 индексига киритилган.
Ҳозирда камида 42 та компания келажакдаги даромадлар бўйича эҳтиёткорона башоратлар бермоқда, 16 таси эса уларни қайта кўриб чиқишни режалаштирмоқда. Улар орасида Apple, Ford, Porsche ва Sony ҳам бор.
Иқтисодчиларнинг фикрича, компанияларнинг йўқотишлари улар ўз ҳисоботларида аллақачон ошкор қилган суммалардан бир неча баравар кўп бўлиши мумкин.
“Компанияларнинг мутлақ кўпчилиги Трампнинг беқарор савдо сиёсати туфайли зарарларни аниқ баҳолаш имконсиз эканлигини таъкидламоқда”, дея қўшимча қилган Reuters.
Халқаро савдо бўйича АҚШ федерал суди 28 май куни Америка раҳбарининг импортга божлар жорий этиш тўғрисидаги қарорини амалга оширишни тўхтатиб қўйди ва буни унинг президентлик ваколатларидан ошиб кетиши билан изоҳлади. Суд нафақат Трамп 2 апрелда эълон қилган 185 мамлакат ва ҳудуддан келтирилган маҳсулотларга жавоб божларини, балки Канада, Хитой ва Мексикадан импортга нисбатан илгари киритилган тарифларни ҳам тўхтатиб қўйди.
Изоҳ (0)