Андижон вилояти Шаҳрихон туманида ҳайдовчининг рулда чалғиб қолиши оқибатида 6 та машина тўқнашди. Бу ҳақда вилоят ЙҲХБ хабар берди.
Маълум қилинишича, ҳолат 3 июнь куни соат 16:30 ларда, Шаҳрихон тумани “Бегбачча” МФЙ ҳудудидан ўтган А-373 халқаро автомобиль йўлининг 415-километрида содир бўлган.
Тошкент-Андижон йўналиши бўйича ҳаракатланиб кетаётган 2 та Lacetti, 2 та Cobalt, Nexia-3 ҳайдовчилари светофорнинг тақиқловчи ишорасида тўхтаб турган вақтларида уларнинг орқасидан оралиқ масофани сақламасдан ҳаракатланиб келган Hundai ҳайдовчиси рулда чалғиб қолиши оқибатида тўқнашув содир этган.
Тўқнашув оқибатида барча транспорт воситалари техник шикастланган, тан жароҳати олган фуқаролар йўқ.
Мазкур ҳолат юзасидан Шаҳрихон тумани ички ишлар ходимлари томонидан суриштирув ишлари олиб борилмоқда.
25 май куни Наманганда Nexia-3 ЙТҲга учраб, ҳайдовчиси билан бирга ёниб кетганди. Фарғонада Nexia ҳайдовчиси босиб кетган велосипеддаги 12 ёшли бола вафот этди. Ҳайдовчи уч йил муддатга барча турдаги транспорт воситаларини бошқариш ҳуқуқидан маҳрум қилиниб, 5 йилга озодликдан маҳрум этилди. 10 майда Тошкент вилояти Бекобод туманида Damas “пешеход”дан ўтаётган пиёдани босиб кетди.
ЙТҲлар статистикаси
Ўзбекистонда 2025 йилнинг дастлабки уч ойида ЙТҲ содир этиши оқибатида 891 нафар шахс судланди.
2024 йил давомида Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) билан 3 321 нафар шахс судланган. Уларнинг 917 нафарига озодликдан маҳрум қилиш жазоси, 2 404 нафарига эса озодликдан маҳрум қилиш билан боғлиқ бўлмаган жазолар тайинланган.
2025 йилнинг I чораги мобайнида ушбу модда билан 891 нафар шахс судланиб, уларнинг 173 нафарига озодликдан маҳрум қилиш жазоси тайинланган.
Шунингдек, 718 нафар фуқарога озодликдан маҳрум қилиш билан боғлиқ бўлмаган жазолар тайинланди.
Изоҳ (0)