Бугун, 9 апрель куни Хитой Молия вазирлиги АҚШдан олиб келинадиган барча товарларга 84 фоизлик умумий бож тарифлари қўлланишини эълон қилди. Бу Қўшма Штатлардан импортга қўйилган 34 фоизлик тарифларни яна 50 фоизга ошириш орқали шаклланган кўрсаткичдир. У 10 апрелдан кучга киради.
Пекиннинг мазкур қарори АҚШ президенти Дональд Трамп томонидан эълон қилинган 104 фоизлик тарифларга кескин муносабат сифатида баҳоланмоқда. Трамп бу божларни “ўзаро адолатли жавоб” деб атаган.
Қўшма Штатларнинг тариф сиёсатини босқичма-босқич кучайтириши хатони хато билан тўлдиришдир. Бу Хитойнинг қонуний ҳуқуқлари ва манфаатларига жиддий путур етказмоқда, дейилади Хитой Молия вазирлиги баёнотида.
Бу ҳолатни “жароҳат устига туз сепиш” деб атаган Пекин Оқ уй устидан Жаҳон савдо ташкилотига (ЖСТ) расмий мурожаат билан чиқди. Хитой ҳукуматининг ташкилотга юборган баёнотида “вазият хавфли даражада кескинлашгани” ва “Қўшма Штатларнинг бепарво сиёсати глобал савдога жиддий хавф туғдираётгани” таъкидланган.
Шу билан бирга Хитой ташқи савдо балансига доир фикрларга ҳам муносабат билдирди. Пекин АҚШ билан ўзаро савдода шаклланган профицитни “иқтисодий муқаррарлик” деб атаб, “зарур бўлса, савдо урушини давом эттиришга етарлича куч ва ирода топиши”ни билдирди.
АҚШ тарифларни музокаралар учун босим ўлароқ кўрмоқда
Дональд Трамп кўплаб етакчилар тарифлар босими остида музокара ўтказишга интилаётганини таъкидлади. Fox Business’га берган интервьюсида у тарифларни бир томондан “доимий чоралар” деб атаган бўлса, иккинчи тарафдан “музокарага ундовчи қурол” деб сифатида кўрсатди.
Савдо уруши глобал молиявий бозорларни ларзага келтирди. Қўшма Штатларнинг S&P 500 индекси 1950 йиллардан буён энг катта йўқотишни қайд этиб, ўзининг энг юқори нуқтасидан 20 фоизга пастлади. Иқтисодчилар тилида бу техник жиҳатдан “айиқ бозори” деб аталади.
Бироқ Хитой томонидан эълон қилинган қарор ҳали ҳаммаси дегани эмас. Европа Иттифоқи ҳам Трамп божларига жавобан 25 фоизли тарифлар жорий қилишни кўзламоқда. Reuters’нинг ёзишича, у мотоцикллар, парранда гўшти, мевалар, ёғоч ва кийим-кечак каби маҳсулотларга татбиқ этилиши мумкин.
Изоҳ (0)