АҚШдаги ноқонуний муҳожир президент Дональд Трампни ўлдириш билан таҳдид қилди. У суиқасддан сўнг ўзини депортация қилишга ваъда бериб, хат юборди. Бу ҳақда ички хавфсизлик вазири Кристи Ноэмга таяниб CNN хабар берди.
Айбланувчи 54 ёшли Рамон Моралес-Рейес бўлиб, ҳозирда ҳибсда сақланмоқда. У 1998—2005 йиллар оралиғида АҚШга камида тўққиз марта ноқонуний кирган. Муҳожир президентнинг митингларидан бирида унинг бошига ўқ узиш билан таҳдид қилган. Тегишли хатни Иммиграция ва божхона бошқармаси ҳамда бошқа ҳуқуқ-тартибот идораларига юборган.
Биз бу президентнинг мексикаликлар билан ўйнашишидан чарчадик — биз бу мамлакат учун сиз оқ танлилардан кўра кўпроқ иш қилдик. Сиз оиламни депортация қилдингиз ва Трамп ўзига муносибини олиши вақти келди, деб ўйлайман. Мен ўзимни Мексикага депортация қиламан, лекин бунинг олдидан 30-6 калибрли милтиғимни ишлатиб сизнинг азиз президентингизнинг бошига ўқ узаман — уни катта митингларидан бирида кўраман, деб ёзган муҳожир ўз хатида.
Таҳдид бўйича тергов давом этмоқда. Тергов давомида аниқланишича, бу шахс АҚШда ноқонуний равишда яшаган ва жиноят тарихига эга бўлган. У ҳозирча ҳибсда қолади, дейди Ичли хавфсизлик вазирлиги расмийси.
Мигрантнинг жиноят тарихида оғир автоҳалокатдан сўнг воқеа жойидан қочиб кетиш, мол-мулкка зарар етказиш ва оилавий зўравонлик аломатлари билан тартибсизлик каби айбловлар мавжуд.
Трампга суиқасд
Дональд Трамп сайлов кампанияси давомида иккита суиқасдга уринишга дуч келганди. 13 июль куни Пенсилваниядаги митингда сиёсатчи қулоғидан яраланганди, тадбир иштирокчиларидан бири ҳалок бўлган, яна икки киши жароҳатланган. Жиноятда гумон қилинаётган 20 ёшли Томас Метю Круксни Махфий хизмат йўқ қилган.
Республикачига иккинчи марта суиқасд қилиш ҳаракати 15 сентябрь куни Флорида штатидаги голф клуби яқинида содир бўлган. Махфий хизмат ходимлари буталар орасида яширинган 58 ёшли Райан Раутга қарата ўт очган. Воқеа жойидан автомобилда қочиб кетмоқчи бўлган эркак ушланган. Ҳодиса жойида нишонли АК-47 автомати, иккита рюкзак ва GoPro камераси топилган. Раут қотилликка тайёргарлик кўришда айбланган.
Изоҳ (0)