Бирлашган Араб Амирликлари фуқаролари учун ChatGPT Plusʼдан фойдаланиш бепул бўлади. OpenAI ва Амирликлар ўртасида тегишли келишувга эришилди. Бу ҳақда Khaleej Times хабар берди.
Мақсад илғор сунъий интеллект воситалари ёрдамида инсонлар ҳаётини янада осонлаштиришдир. Ҳозирда дунё бўйлаб тахминан 20 миллион одам ChatGPTʼнинг пуллик обунасидан фойдаланди ва бу ойига 400 миллион доллардан кўпроқ даромад келтирмоқда. ChatGPT Plus энг сўнгги GPT-40 моделидан фойдаланиш, тезроқ жавоб бериш, вақт ва талаб юқори бўлган даврда устувор фойдаланиш афзалликларини тақдим этади.
OpenAI маълумотларига кўра, бепул версия GPT-40 (баъзи чекловлар билан), файлларни юклаш, овоз ва бошқа воситаларга киришни таъминлайди, Premium обуначилар узайтирилган лимитлар ва кенгайтирилган функциялардан фойдаланади.
Ҳамкорлик доирасида Абу Дабида катта СИ маълумотлар маркази — Stargate UAE қурилмоқда. Бу ерда дунёдаги энг кучли компьютер тизимларидан бири жойлаштирилади. OpenAI ҳукуматлар билан миллий СИ стратегияларини ишлаб чиқишда ҳамкорлик қилишни ва АҚШ сиёсатига мувофиқ ҳаракат қилишни мақсад қилган.
Лойиҳа Nvidiа, Oracle, Cisco, SoftBank ва маҳаллий СИ компанияси G42 каби йирик технология компаниялари томонидан қўллаб-қувватланмоқда. Яратилаётган воситалар маҳаллий тилни қўллаб-қувватлайди, БАА қонунларига амал қилади ва фойдаланувчиларнинг маълумотларини ҳимоя қилади.
Изоҳ (0)