АҚШ Конгресси Вакиллар палатаси аъзоси Жейми Раскин (Мериленд штатидан демократ) президент Дональд Трампдан у уюштирган инвесторлар учун кечки овқат иштирокчиларининг исмларини ошкор қилишни ва меҳмонларнинг унинг “мемкоин” криптовалютасини сотиб олиш учун сарфлаган маблағлари манбалари ҳақида ҳисобот беришни талаб қилди. Бу ҳақда конгрессменнинг мактуби билан танишган The Washington Post (WP) газетаси хабар бермоқда.
“Ушбу рўйхатнинг эълон қилиниши Америка халқига президентнинг чўнтагига юзлаб миллион долларни ким солаётганини билиш имконини беради. Шундан сўнг биз амалда фойдасиз бўлган мемкоинлардан ташқари, улар бунинг эвазига яна нималар олаётганини аниқлашга киришишимиз мумкин”, дейилади мактубда.
Шунингдек, конгрессмен мемкоинларни сотишдан олинган маблағлар террорчилик ташкилотлари, наркокартеллари ва бошқа жиноий фаолият билан боғлиқ эмаслигини текширишга чақирган. Раскиннинг фикрича, бу кечки овқат Трамп ва унинг оиласи ҳокимиятга қайтганидан кейин бойишига имкон берган яна бир фирибгарлик бўлган.
Нашр маълумотларига кўра, Раскин шу тариқа Америка президентига нисбатан парламент текширувини бошлаган.
Аввалроқ Оқ уй матбуот котиби Керолин Ливитт 22 майда бўлиб ўтган инвесторлар билан кечки овқат расмий тадбир бўлмаганини ва Трамп унда хусусий шахс сифатида иштирок этганини маълум қилган эди. Унинг таъкидлашича, давлат раҳбари президентлик даврида манфаатлар тўқнашувига йўл қўймаслик учун барча активларини ўз фарзандларига ишончли бошқарувга топширган.
Трамп ўз криптовалютасини ишга туширишини январь ойида Truth Social ижтимоий тармоғида, инаугурация арафасида эълон қилган эди. CoinMarketCap платформаси маълумотларига кўра, унинг кунлик савдолари ҳажми 11 миллиард доллардан ошган, бу эса мутахассисларнинг фикрича, ғоят юқори даромадлилик даражасини кўрсатган.
Изоҳ (0)