АҚШ президенти Дональд Трамп Хитой товарларига тарифларни 104 фоиздан 125 фоизга оширди. Бу ҳақда у Truth Social ижтимоий тармоғидаги саҳифасида маълум қилди.
Хитойнинг жаҳон бозорларига ҳурматсизлик билан муносабатда бўлишини ҳисобга олиб, мен АҚШда Хитой товарларига қўйилган божларни 125 фоизга ошираман. Бу қарор дарҳол кучга киради, деб ёзган Трамп.
У Пекин яқин келажакда “Қўшма Штатлар ва бошқа мамлакатларни талон-торож қилиш” даври тугаганини тушунишига умид билдирган. АҚШ музокаралар учун мурожаат қилган 75 мамлакат учун божларни 90 кунга кечиктирмоқда. Бу даврда 10 фоизлик ставка қўлланади.
Хитой фуқароларини АҚШга бормасликка чақирди
Хитой ҳукумати Трамп маъмурияти томонидан савдо божларининг кескин оширилишига жавобни кенгайтириш доирасида Қўшма Штатларга бормоқчи бўлган ўз фуқароларини аввал жиддий “хавфни баҳолашга” чақирди.
Хитой ва АҚШ ўртасидаги савдо муносабатларининг ёмонлашиши ва Америкадаги хавфсизлик муаммолари нуқтаи назаридан Маданият ва туризм вазирлиги Хитой фуқароларига Қўшма Штатларга саёҳат қилиш хавфини синчковлик билан баҳолашни ва эҳтиёткорлик билан ҳаракат қилишни маслаҳат беради, дейилади вазирлик хабарида.
Тегишли баёнот Трамп томонидан Хитой экспортига киритилган янги 125 фоизлик божлар сабабли эълон қилинди.
АҚШ ва Хитойнинг савдо уруши
АҚШ президенти Дональд Трамп 2 апрель куни 185 та мамлакатдан импорт қилинадиган маҳсулотларга бож жорий этилишини айтди. Дастлаб Хитойдан келтириладиган маҳсулотлар учун божлар 34 фоиз даражасида белгиланган. Бунга жавобан Пекин ҳам шунча миқдорда Америка товарларига божлар солган.
Шундан сўнг Трамп агар Пекин жавоб чораларидан воз кечмаса, божларни 50 фоизгача ошириш билан таҳдид қилган эди. Шу сабабли божлар 104 фоизга ошган. Бунга жавобан Хитой Америка маҳсулотлари учун божларни 84 фоизга оширишини эълон қилди. Мазкур эълон ортидан Трамп эндиликда Пекин учун тарифлар 125 фоизга чиқишини айтди.
Изоҳ (0)