АҚШ раҳбари Дональд Трамп Мексика ва Канада товарларига 25 фоизлик тарифларни тасдиқлади. Бу нарх-навонинг кескин ошишишига ва автомобиль бозорида салбий ўзгаришларга олиб келиши мумкин. Бу ҳақда Sky News хабар берди.
Хусусан, тарифлар Канада ва Мексикада заводлари бўлган АҚШ компаниялари, масалан, автомобиль ишлаб чиқарувчиларини хавотирга солмоқда. Трамп эса буни қуйидагича изоҳламоқда:
Улар ўз заводларини АҚШда қуриш орқали қўшимча божлардан озод бўлиши мумкин. Агар бу икки давлат томонидан оқиб келаётган фентанил (наркотик модда) чекланса ҳам, тарифларни бекор қилишга ҳеч қандай асос йўқ.
Трампнинг ушбу нутқи Шимолий Америкада савдо уруши хавфини кучайтирди ва молиявий бозорни янада чигаллаштирди.
Канада ҳам зудлик билан бу тарифларга жавобини эълон қилди ва АҚШ импортига 30 миллиард Канада долларига (16,3 миллиард фунт стерлинг) тенг 25 фоизлик божлар жорий қилди. Бундан ташқари, агар АҚШ Канадага қарши санкцияларни бекор қилмаса, божлар 21 кун ичида янада оширилади.
Мутахассиснинг таъкидлашича, АҚШда истеъмолчилар бир неча кун ичида нархларнинг ошишишига гувоҳ бўлиши мумкин. Нью Йоркдаги Корнел университетининг давлат сиёсати профессори Густаво Флорес-Масиаснинг айтишича, бу “айниқса, автомобиль секторига салбий таъсир кўрсатиши мумкин”.
Кўпгина автомобиль компаниялари, шу жумладан, Мексикада катта юк машиналарини ишлаб чиқарадиган General Motors, Automaker ва Ford акциялари нархи ҳам тушиб кетди.
Бундан ташқари, Трамп Хитой импортига божларни икки баравар — 10 фоиздан 20 фоизгача оширгани ҳақида ҳам баёнот берди. Хитой ҳукумати эса АҚШнинг қишлоқ хўжалиги маҳсулотлари импортига тарифлар солишини билдирди. АҚШ фентанил оқими бўйича Пекинни “айбини яширишга” уринаётганликда айблади.
Изоҳ (0)