Жанубий Кореяда ҳукмрон “Халқ кучи” консерватив партияси раҳбари Ким Мун Су президентлик сайловларида мағлубиятга учраганини тан олди. Бу ҳақда Yonhap ахборот агентлиги хабар бермоқда.
“Корея Республикаси дуч келган инқирозга қарамай, халқининг кучи билан олдинга интилишни давом эттирмоқда. Сайланган номзод Ли Чже Мен, сизни табриклайман”, дея таъкидлади Ким Мун Су.
Шунингдек, у сайловда ўзини қўллаб-қувватлаган сайловчиларга миннатдорчилик билдирган.
Маълум қилинишича, сайлов бюллетенларининг 80 фоизи ҳисоблаб чиқилгач, Ли Чже Мен учун фуқароларнинг 48,3 фоизи овоз берган, иккинчи номзод Ким Мун Суни эса сайловчиларнинг 42,7 фоизи қўллаб-қувватлаган.
Таъкидлаш жоизки, Жанубий Кореяда сайловлар нисбий кўпчилик мажоритар тизими асосида бир босқичда ўтказилади. Президентлик пойгаси ғолиби расман 4 июнь куни эълон қилиниши кутилмоқда.
Кореядаги ҳарбий ҳолат ва Юнга қарши импичмент
2024 йилнинг декабрида Жанубий Корея президенти мамлакатда ҳарбий ҳолат жорий этишга муваффақиятсиз уриниб кўрди. Шундан сўнг парламент уни исён кўтаришга уринганликда айблаб, давлат раҳбарига импичмент эълон қилди.
Юн 14 декабрдан (парламент унинг импичменти учун овоз берганидан) президентлик лавозимидан четлаштирилган. Унинг ўзи исёнга уриниш айбловларини рад этиб, ҳарбий ҳолат жорий этилиши “сиёсий жиҳатдан тасдиқланган қарор” эканини айтган. У давлатни фалаж қилган мухолифатдан ҳимоя қилиш учун шундай қарор қабул қилганди.
Аммо Юнни лавозимидан бутунлай четлатиш учун Конституциявий суднинг қарори керак эди. Бу вақт давомида Юн Сок Ёл расман Жанубий Корея президенти бўлиб қолган. Ҳарбий ҳолат эълон қилишга муваффақиятсиз уринганидан 4 ой ўтиб, Юн лавозимидан бутунлай четлаштирилган. Президент ўз қарори билан конституция, қонун устуворлиги ва демократия тамойилларини бузгани таъкидланган.
У исёнга уриниш айбловларини рад этган ва “сиёсий жиҳатдан текширилган қарори” давлатни мухолифатдан ҳимоя қилиш учун қабул қилинганини айтган. Унинг адвокатлари Конституциявий суддаги жараён “ноқонуний ва адолатсиз” бўлганини билдирган. Март ойида суд президент Юн Сок Ёлни ҳибсдан озод қилиб, унга қарши ҳибсга олиш ордерини бекор қилган эди.
Изоҳ (0)