Фарғона вилоятида фермер хўжалиги раҳбарининг 5 минг долларини қўлга киритмоқчи бўлган шахслар ушланди, деб хабар берди Бош прокуратура ҳузуридаги департамент.
Маълум қилинишича, Катта Фарғона магистрал канали бошқармаси муҳандиси У.Т. (муқаддам фирибгарлик жинояти учун судланган) ва бошқалар Тошлоқ туманидаги “Ҳ.Р.” фермер хўжалиги раҳбари Ш.К.нинг ишончига киради.
Улар мазкур хўжаликнинг ёнида жойлашган каналлар бошқармаси муҳофаза зонасига кирувчи 55 сотих ерда келгусида қурилиш ишларини амалга ошириши учун муҳофаза ҳудудига кирмаслиги тўғрисида хат расмийлаштириб беришлари эвазига 5 минг доллар олган вақтида ушланган.
Мазкур ҳолат юзасидан Жиноят кодексининг 25, 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Сўнгги ойларда ерни ноқонуний сотишга уриниш ҳолатлари
2025 йил февралида Фарғонада фуқаро 2,5 гектар ерни 650 минг долларга сотишга келишиб, олдиндан 100 минг долларни олган вақтида ашёвий далиллар билан ушланганди. Тошкент вилояти Оҳангарон туманида жойлашган ва қишлоқ хўжалигига мўлжалланган 32 гектар ерни 2,4 млн долларга ноқонуний сотмоқчи бўлган шахс қўлга олинганди.
Сурхондарё вилоятида фуқаро қишлоқ хўжалигига мўлжалланган 45 сотих ерни 60 минг долларга сотишга келишиб, 56,7 минг доллар ва 43 миллион сўм олган вақтида қўлга тушганди. Хоразм вилоятининг Урганч туманида фуқаро давлат захирасида бўлган 24 сотих ер майдонини кадастр тизимида ишловчи танишлари орқали харидор номига расмийлаштириб бериш эвазига 45 минг доллар ва 13 миллион сўм олган вақтида ушланганди.
Изоҳ (0)