Вашингтон ҳуқуқ фирмаси Сурия қамоқхонасида 63 кун сақланиб, қийноққа солинган АҚШ фуқароси сабабли мамлакатга 20 миллион доллардан ортиқ жарима солди. Бу ҳақда Fox News хабар берди.
АҚШнинг Округ судьяси Коллегин Коллар-Котелли жабрланувчига 20,201,620 доллар миқдорида товон пули бериш ҳақида қарор чиқарган. Бу пулнинг ярми — тахминан 10 миллион доллари — зарарни қоплаш учун сарфланади. Қолгани эса товон сифатида белгиланган.
Сумманинг тахминан ярми АҚШнинг “Давлат ҳомийлигидаги терроризм қурбонлари жамғармаси” орқали тўланади. Бу жамғарма санкциялар натижасида йиғилган пуллар ва бошқа жарималар ҳисобидан молиялаштирилади. Унда қанча пул борлигига қараб жабрланувчи бир неча йил давомида компенсация пулининг маълум фоизини олиши мумкин.
“Халқаро инсон ҳуқуқларини бузган давлатлар жазога тортилиши керак. Сам каби жасур, омон қолганлар эса Асад режимининг зулмларини дунё унутмаслигини таъминлайди”, деди жабрланувчининг адвокати Кирби Беҳре.
Адвокатнинг айтишича, Гудвин Суриянинг собиқ президенти Башар Асад бошчилигидаги ҳокимият даврида Бранч 215 деб аталувчи жойда қийноққа солинган ва узоқ сўроқ қилинган. Гудвин сохта жосуслик айбловини тан олишдан бош тортганида, сўроқ қилаётган ходим уни ИШИДга топшириш билан таҳдид қилган.
Унинг озод қилиниши Ливаннинг энг юқори хавфсизлик амалдори бўлган генерал Аббос Иброҳим томонидан таъминланган. Гудвиннинг оиласи ФҚБ, Марказий разведка бошқармаси, давлат департаменти, президентнинг гаровга олинганлар ишлари бўйича махсус вакили, Ватикан элчилари, Яқин Шарқ экспертлари ва бошқалар билан ҳамкорлик қилиб, уни уйга қайтариш учун тинимсиз ҳаракат қилган.
“Бу суд қарори фақат менга бўлган муносабат эмас. Бу бутун дунёда инсон ҳуқуқлари бузилганлар учун курашдир. Умид қиламанки, бу бошқа жабрланганларга жасорат бағишлайди. Энг муҳими, бундай жиноятлар кечирилмаслигини ва унутилмаслигини эслатиб туради”, деди Гудвин интервьюда.
Изоҳ (0)