АҚШ президенти Дональд Трамп Хитойдан импорт қилинадиган товарларга қўйилган бож ставкасини 145 фоизгача оширди. Бу ҳақда дастлаб CNBS хабар қилди.
Оқ уйнинг телеканалга изоҳ беришича, Трамп маъмурияти томонидан Хитой маҳсулотларига нисбатан жорий этилган божларнинг умумий ҳажми 145 фоизга етган. Мазкур қарор 2 апрель куни эълон қилинган “ўзаро бож сиёсати” доирасида амалга оширилди.
Аввалига АҚШ президенти барча давлатлар учун 10 фоизлик асосий тарифларни жорий қилган эди. Аммо божлар ҳар бир давлатнинг Қўшма Штатлар билан савдо балансига қараб индивидуал ҳисоб-китоб асосида белгиланмоқда. Хитой билан савдода йирик дефицит мавжудлиги боис АҚШ бу мамлакат учун тарифларни анча юқори даражага кўтариб, 54 фоизга етказган эди. Бунга жавобан Хитой Давлат кенгаши Америка маҳсулотларига 34 фоизлик қўшимча бож жорий қилди.
Бунга жавобан Трамп маъмурияти божларни 104 фоизга етказди. Пекин эса 84 фоизлик қўшимча тариф билан жавоб қайтарди. Бундан норози бўлган Трамп 24 соат ичида божларни аввалига 125 фоиз, кейин эса 145 фоизгача кўтаришга қарор қилди.
Хитой Ташқи ишлар вазирлиги расмий вакили Лин Цян баёнот бериб, Пекин божхона урушидан манфаатдор эмаслиги, бироқ ўз манфаатларини ҳимоя қилишдан ҳам чўчимаслигини маълум қилди.
“Тарифлар орқали ҳеч ким ғолиб бўлмайди. Хитой уруш истамайди, лекин курашдан ҳам қўрқмайди”, деди Лин Цян.
Мутахассислар фикрига кўра, ушбу қадам икки томонлама савдо муносабатларида кескинликни кучайтиради ва глобал иқтисодиётга салбий таъсир кўрсатиши мумкин.
Изоҳ (0)