Трампнинг тариф сиёсати ҳамон жаҳон матбуотининг эътибор марказида турибди. Нафақат АҚШда, балки дунёнинг барча мамлакатларида ҳам мутахассислар унинг ушбу сиёсати АҚШ иқтисодиётига зарар етказаётгани ҳақида сўзламоқда. Баъзилар эса унинг шахсиятига ҳам ўтмоқда.
The Wall Street Journal (Нью Йорк, АҚШ)
АҚШ иқтисодиёти бўйича ташвиш аҳолининг барча қатламларига таъсир қилмоқда
Бу йил америкалик истеъмолчиларнинг хавотирланиши учун сабаблар кўп — тарифлар ҳақидаги туганмас янгиликлар, бардавом инфляция, энди эса рецессия хавфи ҳам қўшилди. Бу ташвишлар энди аҳолининг барча қатламларига — бойлардан тортиб камбағалларгача, кундалик эҳтиёж маҳсулотларидан тортиб ҳашаматли буюмларгача — барчасига бир вақтнинг ўзида таъсир қила бошлади.
El Universal (Мехико шаҳри, Мексика)
“Миллий бирлик” Трампни жазолаш учун Америка товарларини сотиб олмасликка чақирмоқда
Бирдамлик... зарур, чунки биз Дональд Трамп сингари ёмон феълли президент билан муносабатда бўляпмиз. У... ичиб олса, мигрантларни қувишга буйруқ беради, Европа давлатларига бостириб киради, Украина президентини ҳақорат қилади ва Мексикага қарши тарифлар жорий этади. Ўзига келгач эса, бас, яна бир ой, дейди.
The New York Times (Нью Йорк, АҚШ)
Трамп америкаликлар маҳаллий ишлаб чиқаришни тиклаш учун иқтисодиётнинг секинлашишига чидашлари мумкинлигига ишонмоқда
Президент Трамп Мексика, Канада, Хитой ва Европа иттифоқига қарши бошлаган бир вақтдаги савдо уруши аслида иқтисодиёт ва сиёсат соҳасидаги катта таваккалчиликдир.
Америкаликлар АҚШни қайта саноатлаштириш учун узоқ муддат давомида иқтисодий қийинчиликларга бардош бера оладими? Бу жуда хавфли ўйиндан бошқа нарса эмас.
Frankfurter Allgemeine Zeitung (Франкфурт, Германия)
Трампнинг иқтисодий таваккалчилиги
“Импорт ўрнини босувчи саноатлаштириш” 1950 йилларда Лотин Америкаси ва Осиёнинг айрим қисмларидаги ривожланаётган мамлакатлар учун ечим сифатида машҳур эди... Бироқ тез орада бу доимий турғунлик, баъзан эса инқироз келтириб чиқариши маълум бўлди... Трамп билан бу ғоя қайтди... Унинг божхона сиёсати компанияларни тиланчилар аҳволига солмоқда... Протексионизм АҚШни янада коррупциялашишига олиб келади. Афсуски, Трампнинг бунга қаршилигига ҳеч қандай ишора йўқ.
Global Times (Пекин, Хитой)
АҚШнинг пўлат ва алюминийга қўйган тарифлари танқидга учради, жавоб чоралари Вашингтонга қарши “кучайиб бораётган” мухолифатни кўрсатди
Янги тарифлар АҚШ пўлат ва алюминий саноатини мустаҳкамламайди... (Бу соҳалар) самарасизлик ва эскирган технологиялардан азият чекмоқда, бу муаммоларни эса тарифларни ошириш билан ҳал қилиб бўлмайди... Тарифлар орқада қолаётган корхоналарни ҳимоя қилади, рақобат босимини камайтиради ва уларнинг ривожланишига ёрдам бермайди.
Тhe Winnipeg Sun (Виннипег, Канада)
Канада тариф урушида унчалик айбдор эмас
АҚШни айблаш осон... лекин ўзимизга ойнага қанчалик қараймиз? Канадалик сиёсатчилар ва саноат раҳбарлари Америка тарифлари ва АҚШ савдо сиёсатидан афсусланишса-да, улар камдан кам ҳолларда Канаданинг ўзи Америка товарларига юқори божлар қўяётганини тан олишади... Канадаликлар учун нархларни оширадиган ва рақобатни чеклайдиган ҳимоячилик сиёсатимизни жиддий муҳокама қилишни бошлаш вақти келди.
Изоҳ (0)