Хитой Америка товарларига божларни аввал эълон қилинган 84 фоиздан 125 фоизгача оширади. Бу ҳақда мамлакат Молия вазирлигига таяниб, Reuters хабар берди.
Қарор 12 апрелдан кучга киради. Бунга АҚШнинг Хитой маҳсулотларига божларни 145 фоизга оширгани сабаб бўлди. Хитой шу муносабат билан Жаҳон савдо ташкилотига шикоят қилди. Си Цзиньпин мазкур савдо уруши борасида қуйидагича баёнот берди:
Бож урушида ғолиблар бўлмайди, дунёга қарши чиқиш бу ўзини яккалашдир. Сўнгги 70 йилда Хитой доим ўз кучига, машаққатли кураш ва меҳнатсеварликка таянган. Пекин ҳеч қачон бировнинг илтифотига суянмаган ва асоссиз босимлардан чўчимаган, деган Хитой раиси.
У АҚШ президентининг божларига қарши курашиш учун Европа Иттифоқини Хитой билан саъй-ҳаракатларни бирлаштиришга чақирди.
Аввалига АҚШ президенти Дональд Трамп барча давлатлар учун 10 фоизлик асосий тарифларни жорий қилганди. Аммо божлар ҳар бир давлатнинг савдо балансига қараб ўзгарган. Хитой билан савдода йирик дефицит мавжудлиги боис АҚШ бу мамлакат учун тарифларни анча юқори даражага кўтариб, 34 фоизга етказган.
Унга жавобан Пекин ҳам шунча миқдорда Америка товарларига божлар солган. Шундан сўнг Трамп агар Пекин жавоб чораларидан воз кечмаса, божларни 50 фоизгача ошириш билан таҳдид қилган. Шу сабабли божлар 104 фоизга ошган.
Бунга жавобан Хитой Америка маҳсулотлари учун божларни 84 фоизга оширишини эълон қилди. Мазкур эълон ортидан Трамп Пекин учун тарифлар 125 фоизга чиқишини айтди, кейинчалик буни 145 фоизга оширди.
Хитой АҚШни “ўзаро божлар”ни бекор қилишга ва ўзининг нотўғри амалиётини тузатишга чақирмоқда. Пекин жавоб божларини ошириш ҳақидаги баёноти фонида доллар Швейцария франкига нисбатан сўнгги 10 йилдаги энг паст даражага тушди.
АҚШ божлари туфайли жаҳон савдоси 3-7 фоизга, жаҳон ялпи ички маҳсулоти эса 0,7 фоизга қисқариши мумкин. Ривожланаётган мамлакатлар энг кўп зарар кўриши кутилмоқда.
Изоҳ (0)