Америка Қўшма Штатлари президенти Дональд Трамп Хитойлик талабаларнинг визаларини бекор қилишини маълум қилди. Бу ҳақда BBC хабар берди.
АҚШ давлат котиби Марко Рубио баёнотида бу чоралар Хитой Коммунистик партияси билан алоқаси бор ёки жиддий соҳаларда таҳсил олаётган талабаларни ўз ичига олишини айтган.
Шунингдек, у визаларни бериш мезонлари ҳам қайта кўриб чиқилишини ва Хитой ҳамда Гонконгдан келадиган келажакдаги талабалар учун текширув кучайтирилишини қўшимча қилган.
Сўнгги ойларда АҚШ ва Пекин ўртасидаги муносабатлар кескин ёмонлашган. Бунга сабаб — Трамп жорий қилган бож тарифлари билан бошланган савдо уруши дея қаралмоқда. 26 май куни Рубио бутун дунёдаги АҚШ элчихоналарига хитойлик талабалар учун виза интервьюларини вақтинча тўхтатишни буюрган.
Ҳисоб-китобларга кўра, 2024 йили АҚШда таҳсил олаётган Хитойлик талабалар сони қарийб 280 минг нафарни ташкил этган.
Хитой фуқаролари илгари АҚШ университетларида ўқиётган хорижий талабалар орасида энг катта улушга эга бўлган эди. Бироқ пандемия давридаги чекловлар ва АҚШ-Хитой муносабатларининг ёмонлашуви фонида бу кўрсаткич сўнгги йилларда пасайган.
“Президент Трамп раҳбарлигида АҚШ давлат департаменти Ички хавфсизлик вазирлиги билан бирга хитойлик талабалар, хусусан, Хитой Коммунистик партияси билан алоқаси борлар ёки жиддий соҳаларда ўқиётганларнинг визаларини ‘тажовузкорлик’ билан бекор қилади. Бундан ташқари, Хитой ва Гонконгдан келадиган барча келгусидаги виза аризаларини янада синчиков кўриб чиқиш учун мезонлар янгиланади”, деди Рубио 28 май кунги қилган баёнотида.
Трамп администрацияси илгари ҳам бир қанча хорижлик талабаларнинг депортация қилинишини тарғиб қилган ва минглаб визаларни бекор қилган эди. Аммо бу ҳаракатларнинг аксарияти судлар томонидан тўхтатилган.
Шунингдек, ҳукумат томонидан университетларга ажратиладиган юзлаб миллион доллар маблағ музлатиб қўйилган. Трамп АҚШдаги энг нуфузли университетларни, жумладан, Гарвардни ўта “либерал”ликда айблаб, уларни кампуслардаги антисемитизмга қарши курашда сусткашликда танқид қилган.
Кўплаб АҚШ университетлари хорижлик талабалар тўлайдиган юқори контракт тўловлари ҳисобига молиявий барқарорликни сақлаб туради.
BBCъга интервью берган баъзи талабалар АҚШда ўқишни танлаганлари учун афсусда эканликларини билдирган.
“Биз АҚШни барча халқаро, жумладан, хитойлик талабаларининг қонуний ҳуқуқ ва манфаатларини чин дилдан ҳимоя қилишга чақирамиз”, деб муносабат билдирган Хитой расмийси.
Изоҳ (0)