Эрондан Туркманистон орқали 60 га яқин Ўзбекистон фуқаролари ватанга қайтарилди, деб хабар бермоқда “Дунё” АА.
Қайд этилишича, Яқин Шарқдаги мураккаб вазият туфайли қатор давлатлар, жумладан Ўзбекистон ҳам ўз фуқароларини хавфсиз равишда ватанига қайтариш бўйича фаол чора-тадбирлар кўрмоқда.
Бунда Туркманистон раҳбарияти ташаббуси билан ушбу давлат ўз ҳудудини транзит мақсадлари учун тақдим этгани, халқаро гуманитар ёрдам кўрсатишдаги фаол иштироки ва улкан ҳиссаси, мамлакат чегара пунктлари, вокзал ва аэропортларида яратилган қулай шароитлар, кўп сонли давлатлар фуқароларининг тезкор ва хавфсиз эвакуация қилинаётгани халқаро ҳамжамият томонидан кенг эътироф этилмоқда.
Ўзбекистон Ташқи ишлар вазирлигининг кўрсатмаларига мувофиқ, мамлакатнинг Теҳрон ва Ашхободдаги дипломатик ваколатхоналарда кеча-ю кундуз ишлайдиган тезкор штаблар тузилди. Тезкор штаб Эронда бўлиб турган Ўзбекистон фуқароларини Туркманистон орқали ватанига қайтариш бўйича комплекс чора-тадбирлар амалга оширмоқда.
Ўзбекистоннинг Теҳрондаги элчихонаси ватандошларнинг хавфсиз ҳаракатланишини таъминлаш бўйича доимий алоқа ва мувофиқлаштирув ишларини олиб боряпти. Ашхободдаги элчихона эса Туркманистон расмийлари билан ҳамкорликда фуқароларини чегарада кутиб олиш, виза ва транспорт масалаларини ҳал этиш ҳамда ватанига қайтариш жараёнини самарали ташкил этмоқда.
Бугунги кунга қадар Эрондан Туркманистон орқали жами 60 га яқин Ўзбекистон фуқаролари ватанга қайтарилди.
Таъкидланишича, Ўзбекистоннинг ҳеч бир фуқароси эътиборан четда қолмайди ва Ватанига етиб олиши учун барча тегишли чоралар кўрилади.
Исроил Туризм вазирлиги томонидан мамлакатда вақтинчалик бўлиб турган туристлар учун хавфсиз тарзда чиқиб кетиш имконини яратиш мақсадида махсус рақамли рўйхатдан ўтиш шакли жорий қилинди.
Ўзбекистоннинг Исроилдаги элчихонаси ушбу мамлакатни тарк этиш истагида бўлган ўзбекистонликлар қандай йўл билан чиқиб кетиши мумкинлиги ҳақида маълумот берганди.
Элчихона бундан аввал мамлакатда мураккаб вазият вужудга келаётганлигини эътиборга олиб ўзбекистонликларга шахсий хавфсизлик чораларини кўриш ва ракета отишмалари пайтида бошпаналарни тарк этмасликни тавсия этганди.
Исроил ҳукумати Эрон билан кескинлик ортгани сабабли фуқароларига мамлакатдан чиқишни тақиқлади. АҚШнинг Исроилдаги элчихонаси америкаликларга мамлакатни тарк этишда ёрдам кўрсата олмаслигини маълум қилди. Исроил ҳаво ҳудудининг вақтинча ёпилгани муносабати билан ушбу мамлакат билан авиақатновлар тўхтатилган.
Изоҳ (0)