Isroil havo hududining vaqtincha yopilgani munosabati bilan ushbu mamlakat bilan aviaqatnovlar to‘xtatilgan. Bu haqda O‘zbekistonning Isroildagi elchixonasi xabar berdi.
Maʼlum qilinishicha, Isroil hukumati va tegishli aviatsiya idoralaridan havo hududining ochilishi to‘g‘risida rasmiy xabar kelib tushishi bilan O‘zbekiston aviakompaniyalari tomonidan keyingi amaliyotlar yuzasidan alohida maʼlumot taqdim etiladi.
Elchixona O‘zbekiston fuqarolarini yana bir bor xavfsizlik qoidalariga qatʼiy rioya qilishga, mamlakatda bo‘lish vaqtida ehtiyotkorlikni oshirishga va raketa otishmalari paytida boshpanalarni tark etmaslikka chaqirmoqda.
Avvalroq Isroildagi o‘zbekistonliklarga zaruriyatsiz ko‘ngilochar joylarga bormaslik tavsiya qilingani haqida xabar berilgandi.
13-iyun kuni kechqurun Eron Isroilga ballistik raketalar bilan ommaviy hujum uyushtirdi. Tel-Aviv va Quddusda portlashlar bo‘ldi. Ushbu hujum tufayli yetkazilgan zarar va jabrlanganlar haqida allaqachon ma’lumotlar paydo bo‘ldi.
Eronning Isroilga qarshi amalga oshirgan to‘rt bosqichli raketa hujumi oqibatida 3 kishi halok bo‘ldi va kamida 70 kishi jarohat oldi.
Izoh (0)