Украина президенти Владимир Зеленский 19 июнь кунги видеомурожаатида Россия ҳозирда Эроннинг ядро дастурини сақлаб қолишга уринётганини айтди. Сиёсатчи Яқин Шарқдаги вазиятга муносабат билдирди.
Ҳозирги кунда Россия Эрон ядро дастурини қутқаришга ҳаракат қилмоқда — уларнинг ошкора сигналлари ва яширин фаолиятини бошқача талқин қилиб бўлмайди. Уларнинг иттифоқчиларидан бири уруш экспорт қилиш имкониятини (қурол юбориш) йўқотса, Россия азият чекади ва аралашишга интилади, деди Зеленский.
Шунингдек, у санкциялар бўйича йиғилиш ўтказганини, ташқи ишлар вазири, разведка ва бошқа давлат органларига халқаро ҳамкорларга янги санкция форматларини таклиф этиш вазифасини топширганини билдирди.
Ўт очишни реал тўхтатиш зарур. Урушни амалда тугатиш керак. Украина энг юқори даражада учрашувга тайёр — бу айнан қарорлар қабул қилинадиган даража. Мен қарор қабул қилувчи ва тегишли ваколатларга эга бўлган шахслар, жумладан, Путин билан ҳар қандай форматда учрашишга тайёрман, гарчи у конституциявий ваколат муддатини камида уч марта оширган бўлса ҳам, деди Зеленский.
Сиёсатчи, шунингдек, урушни АҚШ президенти Дональд Трампнинг жорий президентлик муддати давомида якунлаш афзал бўлишини таъкидлади.
Мен Трампнинг ёрдамига катта умид боғлайман. АҚШнинг таъсири жуда муҳим. Айнан мана шундай ёрдам бизга фойда беради. Санкциялар керак. Дипломатия керак. Хавфсизлик керак, деди у.
Путин Зеленский билан учрашмоқчи
Россия Украинадаги урушни “имкон қадар тезроқ”, тинч йўл билан тугатмоқчи экани ва музокараларни давом эттиришга тайёрлигини маълум қилган. 18 июнь йирик халқаро ахборот агентликлари бош муҳаррирлари билан суҳбатда Путин украиналик ҳамскаби билан учрашиш фикрини билдирган.
Россия музокараларда Украина номидан ким иштирок этаётгани билан қизиқмайди, лекин ҳар қандай якуний келишув қонуний ҳокимият имзосига эга бўлиши керак, деган Путин.
Кремль узоқ вақтдан бери Киевни обрўсизлантириш учун Зеленскийни “ноқонуний” деб кўрсатишга ҳаракат қилмоқда. Россия президенти матбуот котиби Дмитрий Песков 18 февраль куни Россияни 20 йилдан ортиқ бошқарган Путин Зеленский билан музокараларга тайёрлигини, бироқ “унинг қонунийлиги билан боғлиқ ҳуқуқий жиҳатлар”ни кўриб чиқиш кераклигини айтганди.
Изоҳ (0)