Исроил Туризм вазирлиги томонидан мамлакатда вақтинчалик бўлиб турган туристлар учун хавфсиз тарзда чиқиб кетиш имконини яратиш мақсадида махсус рақамли рўйхатдан ўтиш шакли жорий қилинди. Бу ҳақда Ўзбекистоннинг Исроилдаги элчихонаси хабар берди.
Маълум қилинишича, туристлар мазкур ҳавола орқали ўз маълумотларини тақдим этишлари мумкин (исм-фамилия, телефон рақами, электрон почта манзили).
Топширилган маълумотлар махсус рақамли платформаларда сақланади ва фақат зарурат туғилганда, Исроил Миллий Хавфсизлик Кенгаши ва Транспорт вазирлиги билан алмашилади.
Айни пайтда Исроил ҳудудида тахминан 38 минг нафар турист мавжуд. Барча ер орқали чегаралар — Иордания ва Миср билан боғловчи назорат пунктлари очиқ. Кўплаб туристлар айнан ушбу йўналишлар орқали Исроилни тарк этишни афзал кўрмоқда.
Туристлар учун "виртуал ахборот маркази" ишга туширилган бўлиб, 24 соат давомида қуйидаги каналлар орқали маълумот олиш мумкин:
- Электрон почта: virtual@goisrael.gov.ил
- WhatsApp рақами: +972-53-583-5808
Исроил Туризм вазирлиги шунингдек меҳмонхоналар ва бошқа жойлашув муассасалари билан ҳамкорликда ёрдамга муҳтож туристларни аниқлаш устида иш олиб бормоқда, дея қўшимча қилинади хабарда.
Ўзбекистоннинг Исроилдаги элчихонаси ушбу мамлакатни тарк этиш истагида бўлган ўзбекистонликлар қандай йўл билан чиқиб кетиши мумкинлиги ҳақида маълумот берганди.
Элчихона бундан аввал мамлакатда мураккаб вазият вужудга келаётганлигини эътиборга олиб ўзбекистонликларга шахсий хавфсизлик чораларини кўриш ва ракета отишмалари пайтида бошпаналарни тарк этмасликни тавсия этганди.
Исроил ҳукумати Эрон билан кескинлик ортгани сабабли фуқароларига мамлакатдан чиқишни тақиқлади. АҚШнинг Исроилдаги элчихонаси америкаликларга мамлакатни тарк этишда ёрдам кўрсата олмаслигини маълум қилди. Исроил ҳаво ҳудудининг вақтинча ёпилгани муносабати билан ушбу мамлакат билан авиақатновлар тўхтатилган.
Изоҳ (0)