Атом энергияси бўйича халқаро агентлик (МАГАТЭ) Эрондаги объектларга ҳужумлар бўлаётган бир пайтда жим турмаслиги керак. Буни БМТ Хавфсизлик кенгаши йиғилишида Эроннинг ташкилотдаги доимий вакили Амир Саид Иравоний маълум қилди, дея хабар бермоқда Reuters.
“Эрон Исроил тажовузи тўхтамагунча ўзини ҳимоя қилиш ҳуқуқидан фойдаланишни давом эттиради”, деди у.
Унинг сўзларига кўра, Эрон АҚШ можарога аралашиши мумкинлиги ҳақидаги хабарлардан ташвишда.
“Аниқлик киритайлик: Эроннинг ядро дастури тинч мақсадларга йўналтирилган ва МАГАТЭнинг дунёдаги энг кенг қамровли текширувлари остида”, деди Иравоний.
Ушбу баёнотлардан сўнг Исроилнинг БМТдаги вакили Дани Данон Иравонийга мурожаат қилиб, Эрон томони халқаро ҳамжамиятдан ўзини ҳимоя қилишни сўрай олмаслигини таъкидлади.
Исроил 13 июнга ўтар кечаси Эроннинг ядро дастурига қарши “Исёнкор шер" операциясини бошлади. Бир суткадан кам вақт ўтгач, Ислом Республикаси жавоб ҳужумини амалга оширди. Кейинги кунларда Исроил ва Эрон ўзаро зарба беришни давом эттирди. Иккала томон ҳам ушбу ҳужумлар натижасида ҳалок бўлганлар ва жабрланганлар борлигини маълум қилди, ўз ҳудудларидаги бир қатор объектларга зарба етказилганини тан олди, аммо етказилган зарар чекланган эканини таъкидлади.
Изоҳ (0)