Исроил ҳукумати мингта янги кўчма бошпана қуриш ва 500 та мавжуд бошпанани таъмирлаш режасини тасдиқлади. Бу ҳақда Times of Israel нашри мамлакат мудофаа вазирлиги баёнотига асосланиб хабар берди.
“Исроил ҳукумати Мудофаа вазирлиги ва фронт орти қўмондонлигининг мамлакат бўйлаб 500 та жамоат бомба бошпаналарини таъмирлаш ва мингта кўчма йўл бўйидаги бошпаналарни жойлаштириш режасини маъқуллади”, дейилади хабарда.
Таъкидланишича, таъмирланиши режалаштирилган бошпаналар асосан сўнгги кунларда Эрон томонидан бир неча бор ўққа тутилган Исроилнинг марказий қисмида жойлашган, янги кўчма бошпаналар эса “бутун мамлакат бўйлаб хавфли ҳудудларга” йўналтирилади. Бутун режани амалга ошириш давлатга тахминан 28,6 миллион долларга тушади.
Исроил 13 июнь кечаси Эронни махфий ҳарбий-ядровий дастурни амалга оширишда айблаб, унга қарши операция бошлади. Ҳаво ҳужумлари ва диверсия гуруҳларининг рейдлари нишонлари атом объектлари, генераллар, машҳур ядро физиклари, авиабазалар, ҳаво ҳужумидан мудофаа воситалари, “ер-ер” ракеталари бўлди.
Эрон ўз атом лойиҳасининг ҳарбий мақсадларга йўналтирилганини рад этмоқда. МАГАТЭ бош директори Рафаэл Гросси 18 июнь куни маълум қилишича, агентлик инспекторлари Эроннинг ядро қуроли яратиш дастурини амалга ошираётгани ҳақида аниқ далилларни кўрмаган. АҚШ разведка ҳамжамияти президент Дональд Трамп ва Исроил баёнотларига қарама-қарши ўлароқ, Эрон ядро қуролини яратишга интилмаган, деб ҳисоблади.
Эрон Исроилнинг ҳаракатларига ракета зарбалари ва ҳужумчи учувчисиз аппаратлар билан жавоб қайтармоқда, ҳарбий объектларга зарба бераётганини таъкидламоқда. Ҳар икки томондан ҳам турар жой биноларига зарар етказиш ва тинч аҳоли орасида қурбонлар сони ортиб бормоқда.
Эрон Соғлиқни сақлаш вазирлиги маълумотларига кўра, мамлакатда 220 дан ортиқ киши ҳалок бўлган, камида 2,8 минг киши жароҳатланган. Шу билан бирга, Эроннинг Россиядаги элчиси Казем Жалоли 300 га яқин тинч аҳоли ҳалок бўлганини маълум қилди. Исроилда Эрон зарбалари оқибатида 20 дан ортиқ киши ҳалок бўлгани, 1,2 мингдан ортиқ киши яралангани айтилди.
Исроил ва Эрон кунига бир неча марта ўзаро зарбалар бермоқда. Исроил ҳукумати Эрон ядро дастури йўқ қилинмагунча кампанияни давом эттириш билан пўписа қилди. Теҳрон эса, ўз навбатида, Исроил бомбардимонни тўхтатмагунча ўққа тутишни давом эттиришини билдирмоқда.
Изоҳ (0)