Ўзбекистон ташқи ишлар вазирининг биринчи ўринбосари Баҳромжон Аълоев 17 июнь куни Эроннинг Ўзбекистондаги элчиси Муҳаммадали Искандарий билан учрашув ўтказди. Бу ҳақда вазирлик матбуот хизмати хабар берди.
Суҳбат чоғида сиёсий, савдо-иқтисодий, транспорт-логистика, маданий-гуманитар ва туризм соҳаларидаги икки томонлама ҳамкорликнинг бугунги ҳолати ва ривожланиш истиқболлари муҳокама қилинди.
Минтақавий муаммолар, шу жумладан Яқин Шарқдаги вазиятни тинч йўл билан ҳал этиш юзасидан ҳам фикр алмашилди.
Бундан ташқари, Баҳромжон Аълоев Исроилнинг Ўзбекистондаги элчиси Гидеон Лустиг билан учрашув ўтказди.
Суҳбат чоғида Ўзбекистон-Исроил муносабатларининг ҳолати ва уларни янада ривожлантиришнинг устувор йўналишлари, шунингдек, БМТ ва бошқа халқаро ташкилотлар доирасидаги ҳамкорлик муҳокама қилинди.
Минтақавий муаммолар, шу жумладан Яқин Шарқдаги вазиятни тинч йўл билан ҳал этиш юзасидан ҳам фикр алмашилди.
16 июнь куни Бахтиёр Саидов Озарбайжон ташқи ишлар вазири билан Исроил—Эрон можароси юзасидан суҳбатлашганди.
Ўзбекистон Ташқи ишлар вазирлиги Исроилнинг Эронга ҳужумлари юзасидан хавотир билдирганди. Вазирлик барча томонларни тўлиқ вазминликка, ҳарбий ҳаракатларни дарҳол тўхтатишга ва низони сиёсий-дипломатик йўл билан ҳал этишга чақирган.
Ўзбекистон Ташқи ишлар вазирлиги Яқин Шарқда тобора кескинлашаётган ҳарбий-сиёсий вазият муносабати билан Эрон ва Исроилда бўлган Ўзбекистон фуқароларига тавсиялар берган эди. Жумладан:
- ҳарбий ва бошқа давлат объектларига яқинлашмаслик, уларни фото ва видеога олмаслик;
- одамлар кўп тўпланадиган жойлардан йироқда бўлиш;
- маҳаллий ҳукумат органлари томонидан берилаётган кўрсатмаларга сўзсиз риоя қилиш, зарурат туғилганда махсус бошпаналарга ёки хавфсиз жойларга йўл олиш.
Фуқаролардан зарурат туғилганда Ўзбекистоннинг Эрон ва Исроилдаги дипломатик ваколатхоналари билан боғланиш сўралди.
Изоҳ (0)