Эрон ракетаси Исроилнинг Beэр-Шева шаҳридаги Microsoft компанияси офиси биносига зарба берди. Эрон ҳарбийларининг маълумотига кўра, объект бутунлай йўқ қилинган, зарбадан сўнг бино атрофида кучли ёнғин юз берган. Бу ҳақда IRNA хабар бермоқда.
“Microsoft корпорацияси Beэр-Шевага отилган атиги битта ракета билан йўқ қилинди. Режимга кўмаклашишнинг оқибатлари бор!”, дея Ислом инқилоби қўриқчилари корпуси (ИИҚК) вакили сўзларини келтирмоқда агентлик.
20 июнь тонгида эронликлар Исроил томон бир нечта баллистик ракета ва камикадзе дронларини йўллади. Зарбалардан бири Beэр-Шевага тегиб, Гав-Ям Негев техномаркази ҳудудига тушди.
Исроил оммавий ахборот воситалари маълумотларига кўра, 18 киши жароҳат олган, бир нечта бино шикастланган. Технопарк ҳудудида Исроил Мудофаа Кучлари кибербошқаруви штаби (IDF C4I) ва разведка маркази жойлашган бўлиб, унинг ёнида Исроил қўшинлари Алоқа ва ахборот технологиялари корпуси филиали кампуси мавжуд. Beэр-Шева Исроилнинг Неватим ҳарбий авиабазаси жойлашган Негев саҳроси ҳудудида жойлашган.
Исроил 20 июнга ўтар кечаси Теҳронга бир қатор зарбалар берган. Ҳужумлар ядро тадқиқот мажмуаси ва ўнлаб ҳарбий объектларга қаратилган. Зарбаларда 60 дан ортиқ қирувчи самолёт иштирок этиб, 120 та ўқ-дори ташлаган. Исроил Мудофаа Кучлари аниқлик киритишича, нишонлар орасида ракеталар ва ракета двигателлари учун хом ашё ишлаб чиқариш объектлари бўлган. Булар Эрон Мудофаа вазирлигининг саноат асосини ташкил этган. Шунингдек, СПНД ядро лойиҳаси штаб-квартирасига ҳам зарбалар берилган. Бу 2011 йилда ташкил этилган илғор технологиялар ва қурол-яроғларни тадқиқ қилиш ва ишлаб чиқиш марказидир.
Исроил 13 июнга ўтар кечаси Эроннинг ядро дастурига қарши “Исёнкор шер” операциясини бошлади. Бир суткадан кам вақт ўтгач, Ислом Республикаси жавоб ҳужумини амалга оширди. Кейинги кунларда Исроил ва Эрон ўзаро зарба беришни давом эттирди. Иккала томон ҳам ушбу ҳужумлар натижасида ҳалок бўлганлар ва жабрланганлар борлигини маълум қилди, ўз ҳудудларидаги бир қатор объектларга зарба етказилганини тан олди, аммо етказилган зарар чекланган эканини таъкидлади.
Изоҳ (0)