Ижтимоий тармоқларда Эрон ва Исроил давлатлари ўртасида кузатилаётган зиддиятли вазият атрофида турли муносабатлар билдирилмоқда. Ўзбекистон Ташқи ишлар вазирлиги ушбу ҳолат юзасидан фикр билдиришда ўзбекистонликларга тавсиялар берди.
ТИВга кўра, айрим фойдаланувчилар инсонларнинг муқаддас эътиқоди билан боғлиқ туйғулари билан ўйнашиб, турли постлар ва изоҳлар жойламоқда.
Мазкур можаро юзасидан Ўзбекистон расмий муносабат билдиргани қайд этиб ўтилди. Ташқи ишлар вазирлиги икки томонни тўлиқ вазминликка, ҳарбий ҳаракатларни дарҳол тўхтатишга ва низони сиёсий-дипломатик йўл билан ҳал этишга чақирди.
ТИВнинг қайд этишича, Ўзбекистон икки давлат билан ҳам ўзаро мустаҳкам дипломатик алоқаларга эга. Эрон—Исроил можароси Ўзбекистоннинг ҳам манфаатларига жавоб бермайди.
“Инсонларнинг ҳалокатига сабаб бўлувчи мазкур зиддиятли вазият юзасидан муносабат билдиришда аҳолимиз ваҳимага берилиши, эҳтирос ва ҳис-ҳаяжонларга таяниб фикрлаши турган гап”, дейилади хабарда.
Ўзбекистон ТИВ бу каби ҳолатларда қандай йўл тутиш кераклигини эслатиб ўтди:
- 1-эслатма: совуққон, мулоҳазали ва бағрикенг бўлинг.
- 2-эслатма: ҳарбий можарога дин ва эътиқодлар тўқнашуви ракурсида қараманг.
- 3-эслатма: вазмин позицияда бўлинг.
- 4-эслатма: текширилган, ишончли ахборот манбаларидан фойдаланинг.
- 5-эслатма: дин, мазҳаб ёки эътиқод асосида шахсий ёки умумий хулосалар чиқарманг. Чунки бу жамиятда бўлиниш, қарама-қаршилик ва радикал кайфият шаклланишига сабаб бўлади.
- 6-эслатма: давлат органлари матбуот хизматлари ва бошқа расмий мутахассислар фикрларини кузатинг.
- 7-эслатма: фикр билдиришда ва ахборот тарқатишда жамият барқарорлиги ва шахсий масъулиятни унутманг.
Ўзбекистон Ташқи ишлар вазирлиги Исроилнинг Эронга ҳужумлари юзасидан хавотир билдирганди. Вазирлик барча томонларни тўлиқ вазминликка, ҳарбий ҳаракатларни дарҳол тўхтатишга ва низони сиёсий-дипломатик йўл билан ҳал этишга чақирган.
Ўзбекистон Ташқи ишлар вазирлиги Яқин Шарқда тобора кескинлашаётган ҳарбий-сиёсий вазият муносабати билан Эрон ва Исроилда бўлган Ўзбекистон фуқароларига тавсиялар берган эди. Жумладан:
- ҳарбий ва бошқа давлат объектларига яқинлашмаслик, уларни фото ва видеога олмаслик;
- одамлар кўп тўпланадиган жойлардан йироқда бўлиш;
- маҳаллий ҳукумат органлари томонидан берилаётган кўрсатмаларга сўзсиз риоя қилиш, зарурат туғилганда махсус бошпаналарга ёки хавфсиз жойларга йўл олиш.
Фуқаролардан зарурат туғилганда Ўзбекистоннинг Эрон ва Исроилдаги дипломатик ваколатхоналари билан боғланиш сўралди.
Изоҳ (0)