Эрон ўз ҳужумларини тўғрилаш учун Исроилдаги хусусий камераларга уланмоқда. Бу ҳақида Bloomberg хабар бермоқда.
“Сўнгги икки-уч кун ичида эронликлар зарбалар аниқлигини ошириш мақсадида нима бўлганини ва уларнинг ракеталари қаерга тегганини аниқлаш учун камераларга уланишга уринишганини биламиз”, деди Исроил Миллий кибербошқаруви бош директорининг собиқ ўринбосари Рафаэл Франко.
Глобал энергетика компаниясининг хавфсизлик бўйича мутахассиси Плег Вассерман айтишича, истеъмолчиларнинг аксарияти видеокузатув тизими хавфсизлигидан кўра нархига эътибор қаратади.
“Истеъмолчилар бу камерадан фойдаланиши мумкин бўлган ягона шахс ўзлари эмаслигини унутмасликлари керак. Камералар шаҳарнинг панорамали кўринишини ҳам тасвирга олиши мумкинлигини, бу эса Исроилни нишонга олишда фойдали бўлиши мумкинлигини”, дейди Плег Вассерман.
Таъкидланишича, шу ҳафта Эрон баллистик ракеталари Тель-Авивдаги кўп қаватли бинолар яқинига зарба берганидан сўнг, Исроилнинг киберхавфсизлик бўйича собиқ расмийси жамоат радиосида чиқиш қилиб, исроилликларни кузатув камераларини ўчириш ёки уларнинг паролларини ўзгартириш ҳақида огоҳлантирган.
Нашрда қайд этилишича, 2023 йил 7 октябрда Фаластиннинг ҲАМАС радикал ҳаракати ҳужумидан олдин ҳам Исроил шаҳарларидаги камераларга рухсатсиз кирилган.
Исроил 13 июнга ўтар кечаси Эроннинг ядро дастурига қарши “Исёнкор шер" операциясини бошлади. Бир суткадан кам вақт ўтгач, Ислом Республикаси жавоб ҳужумини амалга оширди. Кейинги кунларда Исроил ва Эрон ўзаро зарба беришни давом эттирди. Иккала томон ҳам ушбу ҳужумлар натижасида ҳалок бўлганлар ва жабрланганлар борлигини маълум қилди, ўз ҳудудларидаги бир қатор объектларга зарба етказилганини тан олди, аммо етказилган зарар чекланган эканини таъкидлади.
Изоҳ (0)