Исроил бош вазири Биньямин Нетаньяху АҚШни Эрон билан кенг кўламли урушга киритиш мақсадида АҚШ президенти Дональд Трампни алдамоқда. Бу ҳақда Миллий Эрон—Америка кенгаши президенти Жамол Абди маълум қилди, дея хабар бермоқда Al Jazeera.
Нашрнинг таъкидлашича, АҚШ президентининг Исроил ва Эрон ўртасидаги можарога аралашиш бўйича позициясидаги ўзгаришлар баъзи таҳлилчиларни Трампнинг аниқ стратегияси ёки “ўйиннинг якуний мақсади” йўқ бўлиши мумкин, деган хулосага келишга ундаган.
Экспертнинг фикрича, Трампнинг сўнгги баёнотларининг эҳтимолий сабаби “Нетаньяхунинг уни алдаб, Қўшма Штатларни Эрон билан кенг кўламли урушга тортишга уриниши” бўлиши мумкин.
Абди Америка етакчисининг бундай хатти-ҳаракатига яна бир изоҳ сифатида Трампнинг Эронни “тўлиқ таслим бўлиш” талабларини қабул қилишга мажбурлаш учун куч билан таҳдид қилиш орқали ўз таъсирини оширишга интилаётганини келтирган.
“Менимча, у ўзини олдиндан айтиб бўлмайдиган телба қилиб кўрсатишга уринмоқда. Шу йўл билан у Эрон ўн йиллар давомида рад этиб келган жуда қаттиқ талабни, яъни уран бойитиш дастурини бутунлай тўхтатишни талаб қилмоқчи”, деди Жамол Абди.
Бундан олдин Оқ уй Трамп икки ҳафта ичида Эронга зарба бериш бўйича қарор қабул қилишини маълум қилганди. Таъкидланишича, Америка етакчиси бу қарорини Эрон билан музокаралар ўтказиш эҳтимоли ошгани билан изоҳлаган.
Изоҳ (0)