AQSH elchixonasi amerikaliklarni evakuatsiya qilish yoki Isroilni tark etishga ko‘maklashish imkoniyatiga ega emas. Bu haqda Amerika diplomatik vakolatxonasi veb-saytida e’lon qilingan bayonotda aytilgan.
Ta’kidlanishicha, havo hududi va Ben-Gurion aeroporti yopilgan sharoitda Isroilni tark etishni istagan barchaga AQSH diplomatik missiyasi Iordaniya-Isroil chegarasidagi quruqlik chegara o‘tish joylaridan foydalanish tavsiya etiladi. Xabarda aytilishicha, Iordaniya bilan chegaradagi quruqlik o‘tish joylari ochiq.
Shuningdek, elchixona ehtiyotkor bo‘lish va shaxsiy xavfsizlik haqida xabardorlikni oshirish zarurligini ta’kidlagan. Diplomatlar Amerika fuqarolariga “minomyot, raketa va uchuvchisiz uchish apparatlari hujumlari kabi xavfsizlik bilan bog‘liq hodisalar ko‘pincha ogohlantirishsiz sodir bo‘layotgani sababli” trevoga e’lon qilingan taqdirda eng yaqin boshpana joylashuvini bilib olishni maslahat bergan.
“Xavfsizlik vaziyati murakkab va tez o‘zgarishi mumkin”, deya ogohlantirmoqda elchixona.
AQSHning yahudiy davlatidagi diplomatik vakolatxonalari xodimlari hozircha evakuatsiya qilinmagan va o‘z ish joylarida qolmoqda. Biroq mamlakatni tark etishni xohlovchi oila a’zolariga buni ixtiyoriy ravishda amalga oshirish imkoniyati berilgan.
Elchixonaning ma’lum qilishicha, Isroilda qolayotgan amerikalik diplomatlar va ularning oila a’zolariga keyingi xabargacha yashash joylari yaqinidagi boshpanalarda doimiy ravishda bo‘lish ko‘rsatmasi berilgan.
AQSHning Quddusdagi elchixonasi va Tel-Avivdagi konsullik bo‘limi yaqin vaqtgacha o‘z faoliyatini davom ettirgan, biroq 16-iyun kuni Amerika diplomatik muassasalari kun davomida yopiq bo‘ladi.
Izoh (0)