Россия президенти Владимир Путин учинчи жаҳон уруши бошланиши хавфи уни ташвишга солаётганини эътироф этди. Бу ҳақда у Санкт-Петербург халқаро иқтисодий форуми ялпи мажлиси давомида маълум қилди, дея хабар бермоқда “Лента.ру”.
Форум давомида модератор Иккинчи жаҳон уруши тугаганининг 80 йиллиги яқинда нишонланганини таъкидлаб, Путиндан дунёнинг учинчи жаҳон урушига “яқинлашаётгани” уни ташвишга соляптими, деб сўраган.
“Ташвишлантиряпти, жуда ташвишлантиряпти. Ҳеч қандай киноясиз, ҳазилсиз айтяпманки, албатта, можаро эҳтимоли жуда юқори. Бурнимизнинг тагида — Украинада, шунингдек Яқин Шарқда бўлаётган воқеалар. Буларнинг оқибати нима бўлиши мумкинлиги бизни ташвишга солмоқда”, дея жавоб берган Путин.
Шунингдек, Россия президенти Эрон ядро объектлари атрофидаги вазиятдан ҳам хавотирини билдирган.
“Бунинг оқибати нима бўлиши мумкинлиги бизни ташвишга солмоқда. Бу, шубҳасиз, биздан нафақат содир бўлаётган воқеаларга эътиборли муносабатда бўлишни, балки ечимларни, қарорларни излашни, айниқса, тинч йўл билан топишни талаб қилади”, дейди Россия президенти.
Бундан аввал Россия Федерацияси президенти Владимир Путин Бирлашган Араб Амирликлари президенти Муҳаммад бин Зоид Ол Наҳаён билан суҳбатда Россиянинг Эрон ва Исроил ўртасидаги мулоқотда воситачилик қилишга тайёрлигини маълум қилганди.
Изоҳ (0)