Европа Иттифоқи музлатилган Россия активларидан юзлаб миллиард евроларни олиб, маблағларни Украинага ёрдамни кучайтириши мумкин бўлган хавфлироқ инвестиция фондига ўтказмоқчи. Бу ҳақда Politico хабар берди.
Европа Иттифоқи ижроия органи Бельгияда музлатилган Россия давлат активларининг тахминан 229 миллиард долларини хавфлироқ инвестиция фондига ўтказиш имкониятини кўриб чиқмоқда. Натижада ундан кўпроқ фойда олиш кўзда тутилган.
Европа Иттифоқининг мақсади кўпроқ фойда олиш ва урушдан вайрон бўлган Украина иқтисодиётини сақлаб қолишга ёрдам бериш экани айтилган. Ушбу активлар 2022 йилда Россиянинг кенг кўламли босқинига жавобан музлатилган эди.
Бу қадам Россия активларининг тўлиқ мусодара қилинишига олиб келмайди. Европа Иттифоқининг бир қатор давлатлари, жумладан Германия ва Италия бунга қарши чиқмоқда. Расмийларнинг айтишича, Европа Иттифоқи фақат фоизлардан фойдаланиб, халқаро ҳуқуқни бузганликда айбланишдан қочишга умид қилмоқда.
2024 йилда G7 саноати ривожланган давлатлар гуруҳи аъзолари Украинага музлатилган активларни инвестиция қилишдан олинган тахминан 51,5 миллиард долларни беришга келишиб олганди. Европа Иттифоқининг G7 кредитидаги улуши тахминан 20,6 миллиард долларни ташкил этади ва йил охиригача қайтарилиши айтилган. Расмийларга кўра, Европа Иттифоқи молия вазирлари бу масалани 19 июндаёқ Люксембургдаги норасмий кечки овқатда муҳокама қилади.
Франция президенти Эммануэл Макрон Россиянинг музлатилган активлари урушдан кейин Украинани тиклаш учун ишлатилиши кераклигини айтганди. Бироқ унинг таъкидлашича, ҳозирда бундай ҳаракатлар учун “қонуний асос йўқ”.
Макрон, шунингдек, Украинани қўллаб-қувватлаш, хусусан, Украина армиясини мустаҳкамлаш муҳимлигини қайд этганди. Унга кўра, тинчлик келишуви тузилгандан сўнг, хавфсизликнинг асосий кафолати Украина мудофаа кучларини мустаҳкамлаш бўлиши керак.
Изоҳ (0)