Россия президенти Владимир Путин ташқи ишлар вазири Сергей Лавровни император Пётр I томонидан таъсис этилган, кейинчалик 1998 йилда қайта тикланган олий давлат мукофоти — муқаддас ҳаворий Андрей Первозванний ордени билан тақдирлади.
Россиянинг бош дипломати Сергей Викторович Лавровнинг истеъдоди, билими, тажрибаси ва ақл-заковати унга нафақат мамлакатимизда, балки бутун дунёда сўзсиз ҳурмат келтирди, дея Путин орденни топширди.
Мазкур орден билан ўттиз йил ичида атиги 28 киши, жумладан, Беларусь президенти Александр Лукашенко тақдирланганди.
Путин Лавров “Ватан манфаати йўлида ҳажми ва мураккаблиги жиҳатидан улкан” ишларни амалга оширганини айтган.
Эслатиб ўтамиз, ҳозирда Россия жаҳон иқтисодиётининг ярмини ташкил этувчи давлатларни “дўст бўлмаган” деб ҳисобламоқда. Улар орасида АҚШ (ЯИМ 28 триллион доллар), Европа Иттифоқи давлатлари (ЯИМ 29 триллион доллар), Буюк Британия (ЯИМ 3,4 триллион доллар) ва Япония (4,2 триллион доллар) бор.
Киритилган санкциялар сони бўйича эса Эрон ва Шимолий Кореяни ортда қолдириб, жаҳон рекордчиси бўлиб турибди. 2025 йил бошидаги ҳолатга кўра, 17 мингдан ортиқ чекловлар жорий этилган.
Ташқи ишлар вазирлигида 50 йиллик тажрибага эга ходим, Россиянинг БМТ Хавфсизлик кенгашидаги собиқ доимий вакили Лавровнинг ўзи Украинада уруш бошланганидан кейин жаҳон дипломатиясидан четлаштирилди.
Россияни изоляция қилиш мумкин эмас, деб таъкидлаган Лавров Африкани кезиб юрибди. Чунки унинг бошқа борадиган жойи йўқ. Бошқа қаерга ҳам борарди? Илгари у доим Европада бўлар, турли анжуманларда қатнашарди. Энди бунга чек қўйилди, деди Ташқи ва мудофаа сиёсати бўйича кенгаш раҳбари Федор Лукянов.
Изоҳ (0)