Россия қўшинларининг Украинадаги йўқотишлари 1 млн нафардан ошди

Украина бош штаби 12 июнь куни Россия кенг кўламли босқин бошланганидан бери Украинада 1 миллиондан ортиқ аскарини йўқотганини маълум қилди. Бу ҳақда Euronews хабар берди.

“Россия 2022 йил 24 февралда кенг кўламли босқин бошланганидан бери Украинада 1 миллиондан ортиқ аскарини йўқотди. Сўнгги бир ярим йил ичида 628 000 дан ортиқ одам вафот этди”, деди Украина Қуролли кучлари Бош штаби.

Бу кўрсаткич 1 минг 340 нафарни ташкил этиб, улар орасида ҳалок бўлган, яраланган ва ногирон бўлиб қолган россиялик ҳарбийлар ҳам бор.

Қайд этилишича, Россия 10933 та танк, 22786 та зирҳли жанговар техника, 51579 та транспорт воситаси ва ёқилғи танклари, 29063 та артиллерия тизими, 1413 та ялпи ўт очиш реактив тизими, 1184 та ҳаво ҳужумидан мудофаа тизими, 416 та самолёт, 337 та вертолёт, 40435 та дрон, 3337 та қанотли ракета, 28 та кема ва қайиқ, битта сув ости кемасини йўқотган.

“Бир миллион. Душманнинг ҳужум салоҳияти шунчалик пасайган. Бизни йўқ қилишлари мумкин бўлган, лекин биз уларни йўқ қилган миллион киши. Бу бир миллион зарарсизлантирилган босқинчилар бизнинг жавобимиздир. Бизнинг Буча, Ирпен, Купянск, Херсон ҳақидаги хотираларимиз... Мариуполдаги бомбардимон қилинган туғруқхона ва Киевдаги Охматдыт касалхонаси Россия ракетаси томонидан йўқ қилингани ҳақида. Болаларнинг кўз ёшлари, ўққа тутилган тинч аҳоли ва вайрон бўлган уйлар ҳақида”, деб ёзган Бош штаб.

Киев, шунингдек, жангга ҳисса қўшган ҳар бир украиналик аскарга миннатдорчилик билдирган.

Украина 2022 йил 1 мартдан бошлаб маълумотларни қайд этишни бошлаган. Ўша йили россиялик 5710 киши ҳалок бўлган ва 200 киши асирга олинган. 2022 йилда Россия 106720 нафар ҳарбий хизматчисини йўқотган, бу кунига ўртача 340 кишини ташкил қилади.

2023 йилда йўқотишлар 2 баравардан кўпроқ ошиб, кунига ўртача 693 нафарни, жами 253 290 нафар ҳарбий хизматчини ташкил этган. 2024 йилда кунлик йўқотишлар 1000 дан ошиб, 430 790 нафарни қайд этган. 2025 йили эса Россия кунига ўртача 1286 нафар ҳарбий хизматчисини йўқотмоқда.

Апрель ойи бошида Deutsche Welle нашри НАТОнинг юқори мартабали амалдори Россиянинг кенг кўламли босқиндан кейинги йўқотишлари 900 минг аскардан ошганини, жумладан, 250 минг киши ҳалок бўлганини тахмин қилгани ҳақида хабар берган эди.

Февраль ойида Украина президенти Владимир Зеленский 2022 йил бошидан бери 46 мингдан ортиқ украиналик аскар жанг майдонида ҳалок бўлганини айтган. Шунингдек, унинг сўзларига кўра, 380 мингга яқин украиналик аскар яраланган, ўн минглаб аскарлар эса ё бедарак йўқолган,ё Россия асирлигида қолган.