Россия президенти Владимир Путин мамлакатнинг Қуруқлик қўшинлари бош қўмондони Олег Салюковни лавозимидан озод қилди. У Хавфсизлик кенгаши котибининг ўринбосари этиб тайинланди. Тегишли фармон ҳуқуқий ахборот порталида эълон қилинди.
Олег Леонидович Салюков эгаллаб турган лавозимидан озод этилиб, Россия Хавфсизлик кенгаши котибининг ўринбосари этиб тайинлансин, дейилади ҳужжатда.
Салюков 2008—2010 йилларда Узоқ Шарқ ҳарбий округи қўшинларига қўмондонлик қилган, шундан сўнг 2014 йилгача Россия Қуролли кучлари Бош штаби бошлиғи ўринбосари вазифасини бажарган. 2014 йил май ойида президент фармони билан Қуруқлик қўшинлари бош қўмондони этиб тайинланган.
2023 йилда у Украинадаги Россия қўшинлари бирлашган гуруҳи қўмондони ўринбосари лавозимига тайинланган. Бундан ташқари, Салюков 2025 йил 9 май куни Ғалабанинг 80 йиллиги муносабати билан Қизил майдонда ўтказилган ҳарбий парадга қўмондонлик қилган.
Янги лавозимга тайинланиш генералнинг яқинлашиб келаётган 70 йиллик юбилейи арафасида амалга оширилди. 21 май куни Салюков ҳарбий хизмат учун белгиланган ёш чегарасига етади. Қонунчиликка кўра, бу ёшдаги зобитлар, агар уларга нисбатан шахсий истисно назарда тутилмаган бўлса, қуролли кучлар сафини тарк этиши шарт.
Салюков Россиянинг Украинага кенг кўламли бостириб кириши муносабати билан бир қатор Ғарб давлатлари томонидан санкциялар остида қолмоқда. У аъзо бўлган Россия Хавфсизлик кенгашига 2024 йилдан бери собиқ мудофаа вазири Сергей Шойгу раҳбарлик қилмоқда.
Қуруқликдаги қўшинлар бош қўмондони ким бўлиши ҳали расман маълум қилинмаган. Россия Telegram-каналларига кўра, бу лавозимга Марказий округ қўшинларига қўмондонлик қилган генерал-полковник Андрей Мордвичев тайинланган. У 2022 йил баҳорида Россия қўшинларининг Мариупол ва “Азовстал” заводига бостириб киришига раҳбарлик қилган. Украинада Мордвичев учта жиноий модда, жумладан, агрессив уруш олиб бориш моддаси бўйича айбланмоқда.
Изоҳ (0)