Латвия сейми Россия ва Беларусь фуқаролари ҳамда ушбу давлатларда рўйхатдан ўтган компаниялар учун мамлакат ҳудудида кўчмас мулк сотиб олишни тақиқловчи қонунни қабул қилди. Бу ҳақда LSM нашри хабар берди.
-XHh1v8vy.avif)
Қонунни 69 нафар депутат қўллаб-қувватлади, 8 нафари қарши овоз берди. Ҳужжат “Миллий хавфсизликка таҳдид солувчи битимларни чеклаш тўғрисида” деб номланади. Тақиқ Россия ва Беларусь фуқаролари устав капиталининг камида 25 фоизига эгалик қиладиган ва улар бенефициар бўлган юридик шахсларга ҳам татбиқ этилади. Қонунга бир қатор истиснолар киритилган. Хусусан:
- Россия ва Беларусь фуқаролари, агар мол-мулк уларга мерос йўли билан ёки суд қарори билан ўца, унга эгалик қилиши мумкин.
- Латвияда доимий яшаш гувоҳномасига эга бўлган ёки Европа Иттифоқининг доимий резиденти мақомига эга бўлган Россия ва Беларусь фуқаролари учун енгиллик берилади. Улар ягона уй-жой сотиб олиш имкониятига эга бўлади.
Беларуслар ва россияликлар томонидан кўчмас мулкни сотиб олиш гибрид уруш воситаси сифатида ишлатилиши мумкин, дейилади ҳужжатда.
2025 йил апрель ойида Финляндияда шунга ўхшаш қонун қабул қилинган эди. Унга кўра, мамлакатда кўчмас мулкни фақат доимий яшаш ҳуқуқига эга бўлган Россия фуқаролари сотиб олиши мумкин. 2023 йилдан бошлаб шунга ўхшаш чоралар Литвада амал қилмоқда.
Изоҳ (0)