Россия ва Ўзбекистон миграция масалаларини биргаликда ҳал қилишга, муҳожирларни олдиндан тайёрлашга келишиб олди. Бу ҳақда Россия президенти Владимир Путин нутқига таяниб “ТАСС” хабар берди.
Биз меҳнат бозорида ҳам ижтимоий характердаги кўплаб масалалар борлигини тушунамиз. (Ўзбекистон президенти) Шавкат Миромонович билан миграция масалаларини биргаликда ҳал қилишга келишиб олдик. Чунки бизда меҳнат бозори бугун қандай аҳволда экани маълум.
Сизларда (Ўзбекистонда) маълум даражада босим кузатилмоқда. Лекин нима қилишни биргаликда келишиб олдик. Россияда ишлашни хоҳлайдиган одамларни тайёрлаш масаласини ҳал этамиз, деган Путин дунёнинг етакчи ахборот агентликлари раҳбарлари билан ўтказилган учрашувда.
Унинг сўзларига кўра, ёшлар билан ишлаш муҳим аҳамиятга эга. Шу сабабли ҳозирда Россия ва Ўзбекистон ёшлари ўртасидаги алоқаларни ривожлантиришга катта эътибор қаратилмоқда.
Россиядаги рейдда ўзбекистонликларга жисмоний куч ишлатилган
8 июнь куни Москвада ўтказилган рейдда меҳнат фаолиятини олиб бораётган Ўзбекистон фуқароларига нисбатан ОМОН жисмоний куч қўллаганди. Миграция агентлигининг Россиядаги ваколатхонаси жабрланганлар орасида Ўзбекистон фуқаролари бўлса, жумладан, уларга тан жароҳатлари етказилган, ҳуқуқлари бузилган ёки бошқа муаммоларга дуч келган бўлса, мурожаат қилишни сўраганди.
Муҳожирларга нисбатан шафқатсиз муносабат ортидан Ўзбекистон Ташқи ишлар вазирлиги Россияга нота юборганди. Унда ҳолатга изоҳ бериш, куч ишлатар ташкилот вакилларининг ҳаракатларига ҳуқуқий баҳо бериш сўралган.
Шундан сўнг Россия Ташқи ишлар вазирлиги вакили Мария Захарова нота диққат билан ўрганилишини айтганди. У ўзбекистонлик ҳамкорларнинг тегишли сўрови ваколатли органларга етказилганини билдирган. Олинган объектив маълумотлар белгиланган тартибда Тошкентга юборилишини таъкидлаган.
2025 йил апрель ойи охирларида Россияда ўзбек мигрантлари ҳуқуқларига риоя этилиши назорати кучайтирилиши маълум қилинганди. Икки давлат Бош прокуратуралари мигрантларнинг ҳуқуқларига риоя этилиши устидан назорат ва кузатувни кучайтириш мажбуриятини олганди.
Изоҳ (0)