Россия урушда ҳалок бўлган яна 1,2 минг украиналикнинг жасадини қайтарди. Бу ҳақда Al Jazeera хабар берди.
Украина расмийларига кўра, қайтарилган жасадларнинг умумий сони 4,8 мингдан ошган. Лекин ўт очишни тўхтатиш ва 4 йилдан бери давом этаётган можарони тўхтатишнинг иложи бўлмаяпти.
Бу ҳақда ҳарбий асирлар билан боғлиқ ишларни назорат қилувчи Украина ҳукумати органи — Украинанинг маҳбуслар билан муомала қилиш бўйича мувофиқлаштирувчи штаби Telegram'да маълум қилди ва топшириш шу ой бошида Истанбулдаги музокараларда эришилган келишувнинг бир қисми эканини айтган.
“Мен ушбу гуманитар миссияда иштирок этган барчага миннатдорлик билдираман. Олдинда идентификациянинг муҳим ва масъулиятли босқичи турибди. Бу мураккаб ва нозик иш бўлиб, ҳар бир оилага жавоб олиш имкониятини беради”, деди Украина мудофаа вазири Рустем Умеров.
Ўтган ҳафтадаги бир қатор алмашинувларда Истанбул келишувига мувофиқ 4800 дан ортиқ жасад ватанига қайтарилган. Бу Россия 2022 йил февраль ойида Украинага кенг кўламли босқинни бошлаганидан бери уруш қурбонларининг энг катта алмашинувидан бири бўлди. Россия бунга Украина “жавоб қайтармаганини” айтмоқда.
Россия давлат ОАВлари сўнгги марта 1200 нафар украиналик топширилганини тасдиқлаган. Бироқ Москва бунинг эвазига бирорта ҳам рус жасадини олмаганини айтган. Украина ҳозирча бунга изоҳ бермаган.
Истанбулдаги келишувга кўра, Киев ва Москва бир-бирига 6000 дан ортиқ жасадни топшириши, касал ва оғир яраланган ҳарбий асирлар ва 25 ёшгача бўлганларни алмашиши керак эди. Аммо Россия ҳозирча жами 27 нафар россиялик ҳарбий хизматчини қабул қилгани ҳақида хабар берган.
Изоҳ (0)