Илон Маск Халқаро космик станцияни (ХКС) тезроқ орбитадан туширишга чақирди. Бу ҳақда Newsweek хабар берди.
“Роскосмос” бир неча бора станциянинг ёрилган корпусига герметик модда билан мунтазам равишда ишлов бериб келган. Яқинда космонавтлар ҳаво босими билан боғлиқ аномалия сабабли яна бир бор “Звезда” модули корпусининг ички қисми ёриқларини ямаганди. Аммо SpaceX раҳбари ХКСни ҳалокат юз беришидан олдин имкон қадар тезроқ орбитадан туширишга чақирмоқда.
“SpaceX ХКСга астронавтлар ва юкларни етказиб бериш орқали миллиардлаб доллар ишлаб топаётганига қарамай, мен уни 2 йил ичида орбитадан туширишни расман тавсия қилмоқчиман”, деб ёзди Маск Х’да.
Бугунги кунда Россия, АҚШ, Япония, Канада ва Европа Иттифоқи томонидан бошқариладиган Халқаро космик станция қарийб чорак асрлик тарихга эга. Станция бўлинмаларининг таянч корпуси алюминийдан ясалган. Қобиқни мунтазам қиздириш ва совитиш металлни янада мўртлаштирди, бу эса микроёриқлар пайдо бўлишига олиб келди. Бир кун келиб ёриқлар экипаж ҳаётига хавф туғдирадиган даражада катта бўлиши мумкин.
Маълумотларга кўра, Россия ХКСни 2028 йилдан кейин эксплуатациядан чиқариши мумкин. НАСА АҚШда хусусий муқобил бўлмаса, станциядан 2030 йилгача ва ундан ҳам узоқроқ фойдаланишга умид қилмоқда. Америка хитойликларнинг орбитада ягона бўлишига йўл қўймасликка ҳаракат қилади.
Бироқ ХКСни орбитадан тушириш режаси аллақачон тасдиқланган. Ушбу миссия SpaceX’га топширилган. Бунинг учун компания Dragon юк кемасининг каттароқ версиясини кўпроқ ёқилғи таъминоти билан қуриши лозим бўлади. Шу тариқа ХКС аста-секин пастга туширилади. Сўнгги босқичда SpaceX кемаси унга дунё океанининг белгиланган ҳудудида чўкишга туртки беради.
Изоҳ (0)