Дунё етакчилари Берлинда Ливиядаги фуқаролар урушини муҳокама қилди

Ливиянинг урушаётган томонлари ва бир қанча хорижий кучларнинг раҳбарлари Шимолий Африка мамлакатидаги узоқ давом этган можарони тўхтатиш йўлларини муҳокама қилиш учун Берлинда учрашди. Бу ҳақда Al-Jazeera хабар берган.

Триполининг халқаро миқёсда тан олинган ҳукумати раҳбари Фаёз ал-Сарраж ва унинг рақиби, ҳарбий қўмондон Ҳалифа Хафтар якшанба куни Германия пойтахтида БМТ шафелиги остидаги йиғилишда иштирок этган. Бундай музокаралар 2018 йилдан бери илк маротаба ўтказилмоқда.

Ташриф буюрганлар орасида Туркия президенти Ражаб Тоййиб Эрдоғон, Россия президенти Владимир Путин, Франция президенти Эммануэль Макрон, Италия бош вазири Жузеппе Конте, Буюк Британия бош вазири Борис Жонсон ва АҚШ давлат котиби Майк Помпео бор. Шунингдек, БАА, Миср, Жазоир, Хитой ва Конго вакиллари ҳамда БМТ, Европа иттифоқи, Африка иттифоқи ва Араб давлатлари лигаси раҳбарлари иштирок этади.

Расмий мезбон Германия канцлери Ангела Меркель, Конго президенти ва Ливия бўйича Африка иттифоқи қўмитасини бошқараётган Денис Сассоу Нгуессо билан учрашган.

Меркель илгари Ливияга қурол сотишни тақиқлаш (қурол эмбаргоси) Ливия урушидаги етакчи томонлар, шунингдек, уларнинг ташқи ҳамкорлари ва бошқа миллат вакиллари иштирок этган саммитда устувор вазифа бўлишини таъкидлаган эди.

Мухолиф қўмондон Хафтарни БАА, Миср, Иордания ҳамда руслар қўллаб-қувватламоқда. Франция ҳам унга қандайдир ёрдам берганликда айбланмоқда.

Туркия Триполида жойлашган миллий келишув ҳукуматини (ҳозирда расмий ҳукумат) қаттиқ қўллаб-қувватлайди ва турк парламенти шу ой бошида Ливияга ҳарбий куч юбориш таклифини маъқуллади.Ушбу конференция Ливияда барқарорлик ва тинчликни тиклашга қаратилган сўнгги уринишдир. Уруш 2011 йилда НАТО операцияси чоғида ўлдирилган Ливиянинг собиқ етакчиси Муаммар Каддафидан кейин бошланган эди. Ўшандан бери мамлакат иккига бўлинган: БМТ томонидан қўллаб-қувватланадиган миллий келишув ҳукумати ҳамда Ливия шарқидаги Тобрук шаҳрида жойлашган генерал Хафтар бошчилигидаги мухолифат.