Июнь ойида Ўзбекистон терма жамоасини иккита муҳим баҳс кутиб турибди. Темур Кападзе жамоаси Жаҳон чемпионати саралаши доирасидаги сўнгги икки баҳсни ўтказади: жамоа дастлаб, сафарда БААга қарши ўйнаса, кейин Тошкентда Қатарни синовдан ўтказади. Мазкур баҳслар олдидан Ўзбекистон терма жамоаси устози Темур Кападзе Ўзбекистон Миллий ахборот агентлигига интервью бериб, олдиндаги баҳслар ҳақида тўхталди.
БАА билан ўйинга тайёргарлик
Жамоа 28 май куни Тошкентда йиғилади ва эртаси куни Дубайга учиб кетамиз. Тошкентда бир кун машғулот ўтказамиз. Йиғиннинг илк кунларида жамоа тўлиқ бўлмайди, чунки Аббосбек Файзуллаев “ЦСКА” билан Россия Кубоги суперфиналига чиқди. Улар 1 июнь куни “Ростов”га қарши ўйнайди. Шундан кейин жамоанинг БААдаги йиғинига қўшилади. Туркия чемпионатида ўйнайдиган легионерларимиз билан ҳам шундай ҳолат. Сабаби улар ҳам 1 июнь куни охирги тур учрашувида майдонга тушади. Шунингдек, Жалолиддин Машарипов “Истиқлол” билан Эрон Кубоги финалида ўйнаши мумкин.
Машғулот ўтказадиган жойлар анча яхши. БААга бориб, бир нечта стадионларни кўздан кечирдик. Аввалига Тошкентда тайёргарлик кўриб, ўйиндан бир кун олдин Абу-Дабига бориш варианти ҳам бор эди. Шунингдек, Қатарда ҳам йиғин ўтказишимиз мумкин эди. Охири дастлабки машғулотларни Дубайда ўтказадиган бўлдик. Чунки араб мамлакатлари жуда иссиқ ва биз иқлимга мослашишимиз керак. Шу боис эртароқ учиб бориб, ўша ерда тайёргарлик кўришга қарор қилдик.
Йиғинга чақириладиган футболчилар ҳақида
25 нафар футболчини йиғинга чақиришни мўлжал қилмоқдамиз. Чунки биз йиғинни 28 май куни бошласак, кимдир 3-4 кундан кейин машғулотларга қўшилади. Юқорида айтганимдек, дастлабки кунлар Файзуллаев ёки Алиқулов каби футболчилар бўлмайди. Шунинг учун машғулотларда тўлиқ таркиб бўлиши учун кўпроқ футболчиларни йиғинга жалб қилишни режалаштирганмиз.
Футболчиларнинг спорт формаси ва ўйин амалиёти ҳақида
Бу томонлама бизда хавотир бор. Чунки нафақат Ҳусанов, балки Ашурматов ҳам ўйнамаяпти. Файзуллаев кўпроқ захирадан майдонга қўшилмоқда. Остон ҳам жароҳатдан кейин иккита ўйин ўтказди. Аммо бир ҳафта олдин БААга бориб, бу муаммоларни ечишга ҳаракат қиламиз. Барча футболчилар билан гаплашиб турибман. Яқинда Абдуқодир билан ҳам суҳбатлашдим. Унда барчаси яхши. Мураббий билан ҳам, жамоадаги бошқа футболчилар билан ҳам ҳеч қандай муаммо йўқ. Фақат “Сити”даги рақобат сабаб захирада қолмоқда.
Қолган футболчиларда барчаси яхши. Муҳими барчаси йиғинга соғ-саломат келишсин. Спорт формани йиғин давомида тиклаб олишига ҳаракат қиламиз.
Янги номлар
Рўйхатимизда янги футболчилар бор. Ўзбекистон Суперлигасидаги барча жамоаларни кузатиб боришга ҳаракат қилмоқдаман. Мисол учун, “ОКМК”да бир нечта футболчилар терма жамоа даражасида ўйин кўрсатмоқда. Лекин шуни айтиш керакки, олдинда бизни муҳим баҳслар кутиб турибди. Бу пайтда таваккал қилиш қийин. Ҳали олдинда ўйинлар бор. Балки ушбу йиғинда ҳам янги номларни кўришимиз мумкин бўлар.
Йўлланмани нақд қилсак, бизда FIFA кунлари бўлади. Ўша пайтда номзод футболчиларни ҳаммасини йиғинга жалб қилиб, уларни синаб кўрамиз.
БААга янги мураббий тайинланиши ҳақида
Космин Олариуни БАА бош мураббийлик лавозимига келгани бир оз ноқулайлик туғдирди. Сабаби у қандай схемада ўйнаши ва қайси футболчиларни йиғинга чақиришини билмаймиз. Янги мураббий борасида тезда маълумот йиғишни бошладик. Отабек Шукуров “Шаржа”да ушбу мутахассис билан бирга ишлаган экан. Бу борада Отабек билан гаплашганимизда, яхши мутахассис эканлигини айтди. БААга борганимда “Шаржа”ни “Ажман” билан ўйинига ҳам қатнашдим. Шунингдек, уларни бир нечта ўйинларини ҳам кузатдим. Ўзимнинг режаларим бор, шу бўйича тайёргарлик кўрамиз.
Азиз Ғаниев терма жамоага чақириладими?
БААга қилган сафарим пайти Ғаниевнинг ўйинларини ҳам кузатиб бордим. У қандай позицияда ўйнаяпти, ҳолати қандай, барчасини кўрдим. Кенгайтирилган рўйхатимизда 50 нафарга яқин футболчи бор. Унда Азиз ҳам бор. Ҳали яна ўйинларни кузатамиз ва якуний қарорни қабул қиламиз. Лекин бошқа нарса айта олмайман.
Изоҳ (0)