Eron o‘zining yadroviy dasturini cheklash uchun AQSHga bir qancha shartlar qo‘ydi. Tomonlar 12-aprel kuni Ummonda bilvosita muzokaralar olib bordi. Bu haqda The Wall Street Journal xabar berdi.
Shartlarga ko‘ra, Amerika Eron atom sektoriga qarshi sanksiyalarini yumshatishi, xorijdagi milliardlab dollarlik muzlatilgan aktivlarni blokdan chiqarishi kerak. Eron neftini sotib olayotgan Xitoy kompaniyalariga nisbatan bosimni to‘xtatish ham talab qilingan.
Buning evaziga Tehron 2015-yilda imzolangan yadroviy kelishuv doirasida belgilangan uranni boyitish darajasiga qaytishga tayyor. Mazkur kelishuvni AQSHning sobiq prezidenti Donald Tramp o‘zining birinchi prezidentlik davrida bekor qilgan edi.
Ta’kidlanishicha, Tehron qo‘shimcha majburiyatlar olmasa, Vashington sanksiyalarni yumshatishga rozi bo‘lishi dargumon. Tramp ma’muriyati hozircha Eronning yangi kelishuv doirasida uranni boyitish huquqini saqlab qolishiga qarshi.
Biroq bu muzokaralarda AQSH maksimalistik talablarni ilgari surmadi, balki respublika o‘zidagi mavjud materialni qurolga aylantirmasligiga e’tibor qaratdi, deyiladi xabarda.
Eron tashqi ishlar vaziri Abbos Araqchi muloqotni “konstruktiv” deb atagan. Uning so‘zlariga ko‘ra, muhokama “o‘zaro hurmat bilan” olib borilgan.
Menimcha, biz muzokaralar uchun asos yaratishga juda yaqin turibmiz. Agar keyingi haftada shu asosni to‘liq ishlab chiqishga muvaffaq bo‘lsak, real munozarani boshlashimiz mumkin, degan u.
Oq uy ham muzokaralarni “ijobiy va konstruktiv” deb baholagan.
Bu masalalar juda murakkab va Trampning maxsus vakil Uitkoffning to‘g‘ridan-to‘g‘ri muloqoti o‘zaro manfaatli natijaga erishish yo‘lida oldinga tashlangan qadam bo‘ldi, deyiladi xabarda.
Trampning o‘zi muzokaralar “yaxshi ketayotganini” ta’kidladi, biroq aniq natija bo‘lmaguncha “hech narsa ahamiyatsiz” ekanini aytdi.
Izoh (0)