Туркия президенти Ражаб Тоййиб Эрдўғон Россия ва Украинани тинч мулоқотга олиб бориш ҳамда ҳарбий ҳаракатларга чек қўйиш учун ўзига хос позицияга эга, дейилади Daily Sabah нашрида чоп этилган мақолада.
Нашр таъкидлашича, Эрдоғўн Россия президенти Владимир Путин ғалла келишувидан воз кечган пайтда, уни музокаралар столига қайтара олган ягона лидер эканини исботлаган. Эрдўғон ўз натижасини қуйидагича изоҳлаганди: «Путин ушбу дон йўлагини бошқалар орқали очишга рози эмас. Лекин мен қўнғироқ қилганимдан кейин у дарҳол йўлакни очди».
Вашингтон институтининг Туркия бўйича эксперти Сонер Чағаптайнинг айтишича, Туркия позициясини Украина тарафдори деб ифодалаш мумкин, лекин у Россияга ҳам қарши эмас.
«Бу эса Анқарага можаронинг барча томонларига мос келадиган воситачи ролини ўйнаш имконини беради. Туркия Ғарб томонида қолмоқда, лекин Россияга таъсир ўтказиш учун у билан муносабатларни бузмайди», — деди эксперт.
АҚШнинг Туркиядаги собиқ элчиси ва Wилсон Center Яқин Шарқ дастури раҳбари Жеймс Жеффри ҳам бу борада ўз фикрини билдирган: «Эрдоғон Россиянинг ғалабасига йўл қўймаслик учун Ғарб билан бирга. Аммо бундан ташқари у Туркиянинг Россия ва Украина, шунингдек, Ғарб ва Яқин Шарқ билан муносабатда ўз мавқейини максимал даражада оширишга ҳаракат қилмоқда. Менимча, бу кўп қиррали ёндашув тўғри ва самарали. Эрдўғон ҳукумати Украинадаги инқирозни ҳал қилиш ва Россия ва Украина раҳбарлари билан музокаралар олиб бориш учун кўприк бўлишга уринмоқда».
Россия армияси Украина шаҳарларини ўққа тутишда давом этаётган бир пайтда дипломатия алоҳида аҳамиятга эга, деб таъкидлади нашр. Унга кўра, Туркия урушни тугатиш бўйича музокаралар ўтказиш учун шароит яратишга қодир ягона куч бўлиб қолмоқда.
Аввалроқ ОАВда Туркия расмийлари Россия ва етакчи Ғарб давлатлари ўртасида Истанбулда музокаралар ташкил этишга тайёрлиги ҳақида хабарлар тарқалганди.
Шунингдек, 18 октябрь куни Анқара Путин ва Зеленскийни учраштиришнинг ҳозирча ҳеч қандай имкони йўқлигини билдиргани ҳақида хабар берилган.
19 октябрь куни Эрдўғон Украина етакчиси Владимир Зеленский билан телефон орқали мулоқот қилиб, уни мамлакатдаги можарони дипломатик усуллар билан ҳал қилишга чақирган ва унга «ҳар қандай шароитда ҳам» музокараларга рози бўлишни таклиф қилган эди. 21 октябрь куни эса Туркия раҳбари «Путин Украина билан музокаралар борасида юмшаган»ини маълум қилди.
Изоҳ (0)