Туркия армияси Суриядаги курд тузилмаларига қарши ҳарбий операцияга тайёргарлик ишларини тўлиқ якунлади, қуролли кучлар тегишли буйруқни кутмоқда. Бу ҳақда ТGRT Haber телеканали, Тurkiye ва Мemur газеталари маълумот манбаларини кўрсатмасдан хабар берди.
Суриядаги ушбу операция Туркия армияси учун 2016 йилдан бери бешинчи операция бўлади, бунда Анқара асосан турк қуролларидан фойдаланмоқчи, уларнинг улуши 80 фоизга етади.
Нашрларнинг таъкидлашича, Туркия ҳукумати операцияда Bayraktar ТB2 ҳужумчи дронларидан; FIRAT М60ТМ танкларидан; Т129 АТАК ҳужум вертолётларидан; Корал радиоэлектрон уруш тизимларидан; ÖZGÜR тизимига мувофиқ модернизация қилинган Американинг F-16 қирувчи самолётларидан; юқори аниқликдаги ҳаво ва ерга асосланган ракеталардан кенг фойдаланишни режалаштирмоқда.
Туркия ҳукумати Сурия шимоли ва Ироқдаги «террорчи» тузилмаларни тўлиқ йўқ қилиш ниятида эканини май ойининг охирида маълум қилганди. 1 июнь куни президент Тойиб Эрдоғон Сурия ҳудудида янги аксилтеррор операцияси бошланганини расман эълон қилди. Унинг аниқлик киритишича, асосий мақсад Талл-Рифат ва Манбиж шаҳарлари устидан назорат ўрнатиш. Операция Туркия жанубий чегарасидан 30 километр узоқликда жойлашган ҳудудда ўтказилиши режалаштирилган. Бу ҳудудларда Курдистон ишчилар партияси кучлари жамланган, Туркия ҳукумати уни террорчи ташкилот деб билади.
Изоҳ (0)